Despues di analisa e situacion, Corte a yega na e conclusion, cu e otorgamento di kiosco na e 8 huurdo di kiosconan contra kendenan Gobierno di Aruba a cuminsa un caso, tabata forma parti di un “afscheidsbeleid” di Gobierno anterior. Pero na mesun momento ta bisa cu mester permiti DIP analisa peticion di e grupo aki si tin conseho positivo pa nan haya un di e kiosconan aki bek.
Den e veredicto ta para cu Corte ta condena cada un di e 8 huurdo di kiosconan aki pa bandona e kiosco cu nan tin den uzo riba Welkom Plaza den 7 dia di tempo despues di e veredicto; despues di decision di Minister di Medio Ambiente, Infrastructura y Integracion unda cu ta mustra cu e kiosco a wordo otorga na un di tercer persona; despues cu e conseho di DIP riba cual e decision aki (di otorga na un tercer persona) ta basa; un acuerdo di huur cu ta mustra cu esaki a wordo gehuur na un di tercer persona.
Hues ta bisa cu e ciudadanonan mester spera di Gobierno cu reglanan ta wordo respeta y evita “vriendkespolitiek”, “clientelismo” y patronahe. Corte a constata cu e acuerdo di huur den caso di tur e 8 huurdo di kiosconan a wordo haci den e ultimo dianan di Gabinete Demisionario Mike Eman II y cu no tin bista riba e forma con a anda cu e diferente peticionnan.
Pesey, e pregunta escencial den e caso aki pa Corte ta si por papia di un “afscheidsbeleid”, cu ta nifica un decision dudoso cu a wordo tuma prome cu cambio di Gobierno, cu e meta pa pone e siguiente gobernacion pa cu un “fait accompli”, siendo cu nan lo por dicidi otro. Corte ta bisa cu Gobierno (Pais Aruba) mester percura cu interes di ciudadanonan ta wordo atendi di forma obhetivo y cu na momento di otorga permisonan manera esaki, e ta tuma luga di un forma cu e ta controlabel pa ciudadania a base di reglanan poni pa esaki. Den esaki Corte ta bisa mester evita patronahe y “vriendjespolitiek”.
Den prensa a wordo bisa cu e area aki ta pa promove Aruba y su productonan, esta artesanonan, pero no ta conoci si a cumpli cu e pensamento aki. Gobierno ta bisa cu niun caminda ta para cu a tene cuenta cu e condicion of meta ariba menciona. Esaki pasobra ta bende productonan di China y niun a bisa cu nan ta artesano local, pero personanan cu tin un of otro relacion cu ex Minister Sevinger. Hasta tin actividad di horeca pa cual DOW a duna un conseho negativo. Analisando tur e puntonan aki Corte ta conclui cu aki ta trata di un “afscheidsbeleid”. Pa e motibo aki e peticion pa “ontruiming” por wordo otorga.
Di otro banda den Corte durante tratamento un di e abogadonan a lesa un carta, cu no a wordo entrega, unda e Minister ta priminti un ambtenaar cu e lo haya un di e kioskonan aki. Esaki, Hues a bisa, lo tin ripiticion di e decision anterior, pero na bentaha di esnan cu ta alia cu e actual Gobierno. Corte ta bisa cu e no ta descarta cu cu e otorgamentonan di e kiosconan atrobe lo wordo uza politicamente. Mirando cu a cuminsa e caso contra un grupo so, por bisa cu tin mas procedura na caminda of e ta un “politieke afrekening”.
Pesey Corte a bay di acuerdo cu e peticion di Pais Aruba bou di cierto condicionnan. Esta cu ta otorga e kiosco basa riba e maneho publica. SI e conseho di DIP ta pa otorga permiso na un di e demandadonan, nan no mester bandona e luga ni entrega e yabi. Den e otro casonan si nan lo mester entrega yabi (esnan cu no lo haya permiso). Esey ta nifica cu asina e acuerdo nobo wordo firma cu e huurdo nobo, e huurdo di kiosconan cu no haya permiso nobo mester bandona e luga.
Click AKI pa lesa e sentencia completo
