E siman aki prome minister di Corsou Eugene Rhuggenaath a biaha pa Hulanda cu e meta pa logra yega na un acuerdo pa haya placa. Caha di Gobierno ta bashi. Sinembargo no a logra firma un acuerdo y e combersacionnan ta sigui otro siman, pero na Corsou.
Prome cu e reunion di Conseho di Minister di Reino, e mandatario tabatin un audiencia cu Rey Willem Alexander pa mustr’e riba e problemanan di Corsou. E reunion aki a tuma luga riba diahuebs, 29 di october, na Paleis Huis ten Bosch, Den Haag.
Koning Willem-Alexander y Koningin Máxima ta combersa telefonicamente (video) y ora cu ta posibel durante bishitanan di trabou riba e consecuencianan di coronavirus y e contribucion di esnan envolvi pa combati e pandemia.
Rhuggenaath a bay cu e intencion pa kita e ultimo obstaculonan y firma un acuerdo cu Hulanda pa haya apoyo di likides debi na e problemanan cu e isla, y mescos cu Aruba, ta pasando aden debi na e consecuencianan di coronavirus.
Aruba por medio di prome minister Evelyn Wever Croes a mustra un optimismo pa yega na un acuerdo despues di peticion pa haci algun adaptacion den e acuerdo.
Sinembargo no a logra yega na un acuerdo definitivo ni firma un acuerdo, segun e ultimo informenan ricibi. Pero si ta bisa cu a logra basta avance. E intencion tabata pa logra yega na un acuerdo prome cu e reunion di Conseho di Minister di Reino y eyden simplemente acorda e palabracionnan. Sinembargo esaki no a sosode.
Prome Minister Rhuggenaath a bisa di spera di por yega na un acuerdo definitivo otro siman, ora cu pone e puntonan riba i. E mandatario hunto cu Raymond Knops ta biaha diadomingo awo pa Corsou, unda lo sigui cu e reunionnan den cual lo ta presente diferente instancia manera Conseho di Minister y Parlamento. Knops na final di e encuentro a expresa su deseo pa otro siman por logra na firma un acuerdo.
No ta conoci riba ki puntonan no tin acuerdo ainda, pero ambos a expresa na prensa cu nan ta contento di e avancenan.
Loke si Conseho di Minister di Reino a bisa ta cu Corsou a cumpli awo si cu tur e condicionnan di e segundo tranche di apoyo di likides cu ta habri porta, segun Knops, pa e siguiente fase.
Si yega na un acuerdo otro siman, Corsou lo haya placa cu por yuda e pais te cu december.
