No ta un secreto cu e canta autor, musico , entertainer Claudius Philips ta un di e artistanan mas stima riba e isla ruman Corsou. Cada biaha cu haya oportunidad, un of otro promotor ta haci un yamada y cu masha placer tanto Claudius y OREO ta subi avion pa asina brinda Corsou e miho ambiente cu nan tin semper pa ofrece na nan.
E biaha aki a toca turno na Claudius biaha su so, un presentacion special a surgi pa asina celebra Dia di Mama entre algun mama cu a haci un peticion na su persona pa brinda nan e anochi di hopi cantamento y bailamento cu su cancionnan mas gusta.
A haya chens di entrena cu agrupacion Classic XD pa asina haci e presentacion cu nan acompañamento. Di antemano Claudius a avisa e banda pa nan prepara pasobra ni cuanto nan entrena, ora di presenta e ta bira loco y cos ta cambia. Parti di e mundo artistico ora ta biba y anima e publico, ta locual cu Claudius a comparti.
For di momento cu el a representa Antias tempo di festival OTI cu ta casi un cuarenta aña pasa, pais Corsou a habri brasa ricibie. Su prome show cu el a haci den su bida tabata na Prinses Beach Corsou. OTI festival cual el a gana y caminda por bisa cu su carera a cuminsa.
Na Bandabou un grupo grandi a bin brasa y saluda Claudius y asina e anochi a continua cu un cancion tras di otro pa deleita tur presente. E publico ta acepta y biba cu cada piesa y ta algo cu Claudius ta gradici inmensamente cada biaha cu e yega e hermana isla Corsou.
Tin plan di lansamento di produccion nobo na caminda, algun detaye a bin den publicidad caba pero algun Claudius tin bon wanta te ora cu momento yega y hopi ta cancion nobo cu segun e mes a conta, a tarda un tiki pa Sali pero pronto lo ta eyfo pa un y tur por gosa riba nan.
No a descarta tambe cu lo tin mas biahamento na caminda di cual e ta sinti masha bendiciona di por tin di haci y si por tin e chens ta algo cu e team di farandula lo haci lo posibel di ta presente pa asina cubri nos artistanan unda cu nan ta destaca rond mundo.
