Djasabra pasá e di tres torneo di gòlf pa Fun(d)raising di CliniClowns a tuma lugá na kancha di gòlf na Emmastad. Un gran kantidat di partisipante entusiasmá a hunga den den tim di dos, tantu mainta komo mèrdia, pa e bon kousa di CliniClowns.
E wega di ‘two men best ball’ a tuma lugá den un ambiente ameno, den kua naturalmente tur hende tambe a hasi nan máksimo esfuerso pa gana un di e bunita premionan. Banda di e premionan regular pa mihó tim, e trofeo di ‘closest to the nose’ ta unu ku ta eksistí spesialmente pa e torneo di CliniClowns.
Klaro ku e payasonan mes tampoko no por a hasi falta; nan a sòru pa un dushi ambiente na sede di e klup despues di e wega, i naturalmente nan a duna un man tambe ku entrega di e premionan i sorteo di e rifa. “Nos ta mashá kontentu ku sosten di e komunidat di gòlf i e apoyo di Curaçao Golf & Squash Club den organisashon di e torneo. Nos por a ripará ku ta tin mas kompetensha di otro aktividat e aña aki. Nos ta super orguyoso di tur partisipantenan, paso ku e bientu dje dianan aki e no tabata fasil. Sinembargo e tabata un evento konmovedor i un éksito rotundo manera semper;” asina e organisashon a laga sa.
E fundashon tambe a menshoná ku lo usa e fondonan rekoudá pa kontinuashon di nan trabou importante i kapasitashon profeshonal kontinuo di nan payasonan.
Pa 14 aña largu kaba, Fundashon CliniClowns Kòrsou ta trese distraishon i dibertishon pa mucha ku tin un malesa, mucha ku desabilidat i pa hende ku demensia. E payasonan profeshonal i kapasitá ta bishitá tur e lugánan kompletamente grátis. E fundashon ta dependé kompletamente di sosten for di komunidat di Kòrsou, entre otro pa medio di e tipo di aktividatnan di fundraising aki, donashon (mensual) i patrosinio di sosionan korporativo.
