Pa medio di un decreto gubernamental firma pa gobernador di Corsou, Lucille George-Wout, a decreta e pandemia di Covid-19 oficialmente como un estado di emergencia entrante ayera diabuebs, dia 10 di december ultimo. E decreto aki, ta haci posibel pa durante 90 dia aplica medidanan di precaucion y proteccion, segun cierto disposicion legal den e Ley di Estado di Emergencia cu Parlamento di Corsou a aproba riba dia 3 di december ultimo.
Conforme ley di Estado di Emergencia y cu e decreto di e crisis di pandemia di COVID-19, gobierno a nombra un team di supervision. Despues cu a aproba y publica e ley, esaki a bira awor e paraplu cu por carga tur decreto cu lo por bini na vigor na momento di un situacion di crisis of emergencia. Diaranson ultimo, dia 9 di december, Conseho di Minister a dicidi pa decreta un situacion di emergencia y a manda e decreto aki pa gobernador.
E decreto ta trata entre otro limitacion di libertad di movecion publico, limitacion den entrada di personanan for di exterior y reenforsa cumplimento cu reglanan di higiena, distancia y prevencion di aglomeracion. A base di e decreto aki Gobierno tin base pa por mara sancion na incumplimento cu e medidanan stipula.
Un copia di e decreto gubernamental firma pa gobernador a bay pa entre otro Parlamento di Corsou, Secretariado di Conseho di Minister di Corsou, Raad van Advies y Gobierno di Hulanda, Aruba y St. Maarten. A publica e decreto gubernamental aki y ta disponibel tambe riba www.gobiernu.cw.
E estado di emergencia cu a decreta aki, por tin un duracion maximo di 90 dia. Cualkier cambio, adaptacion of prolongacion di e estado di emergencia actual mester bolbe pasa e trayectoria di aprobacion cerca gobernador y parlamento. Si acaso parlamento ta di opinion cu no ta existi un estado di emergencia (mas), esaki por para ehecucion di e decreto aki na cualkier momento.
E Ley di Estado di Emergencia den su totalidad ta duna Gobierno e base huridico pa aplica extra medidanan di precaucion y proteccion den caso di cualkier situacion di crisis of emergencia nacional cu ta pone interesnan vital di e pais of su comunidad na peliger. Algun ehempel por ta desasternan natural (horcan, tsunami of temblor), un pandemia (manera Covid-19), actonan di terorismo, efectonan di un guera of cualkier situacion cu por peligra salubridad y siguridad publico. Pa tur informacion, bishita e pagina di gobierno di Corsou, www.gobiernu.cw pa tur publicacion di ley y decreto y e team di supervicion.
Situacion na Aruba
“Nos no ta evaluando un decreto similar. Cu locual nos tin awo, cu ta renoba cada tres dia, nos ta convenci di por mantene e situacion bou control”, asina Rino Hermans, director di Bureau Rampenbestrijding Aruba (BRA) a contesta riba nos pregunta, basa riba e decision di Corsou. Ta considera cu e cifranan riba nos isla ta manehabel y ta spera di baha e cantidad di casonan activo drasticamente den e dianan nos dilanti, sin cu mester escala medidanan. Den caso cu e casonan no baha, lo aplica mas medida, pero ainda no ta evaluando ni considerando un ley di estado di emergencia, pasobra e consecuencianan