Diasabra anochi atrobe Polis mester a pasa na diferente bar y nightclub pa percura cu luganan ta cera na ora y cu e hendenan ta bandona e sitio.
Establicementonan cu Polis a pasa tabata na Lekker na Noord y Oxygen Lounge na Wayaca. Atrobe despues di 11’or di anochi musica tabata bati den Lekker y yena cu hende y hopi auto pafo. Ta ora Polis para pafo cu nan zwaailicht cendi, ta e ora ey doñonan di bar ta tuma nan responsibilidad y cuminsa para musica. A cende luz y pidi hende pa bandona e luga.
Un rato situacion a mustra di bira tenso, pero refuerso di otro Polisnan cu a yega mesora a pone e situacion di biaha bou control.
Na Oxygen Lounge na Wayaca ora Polis a bay pa para tur cos a duna tambe multa na esun responsabel. Gobierno a pone su reglanan cu ta 11or di anochi mester cera. Y awor bo ta haya situacion unda ta keda habri y Polisnan ta cera y duna multa. Awe marduga ta varios multa a cay.
