Habitantenan rond di nos isla ta buscando manera pa haci nan pagonan via e diferente oficinanan di MFA, como tambe na HBK na San Nicolas, nan cuentanan cu Departamento di Impuesto.
Prome nan ta haya sa cu sistema ta down y cu no tin manera pa paga y awo atrobe. Diferente habitante a expresa nan frustracion, bisando cu nan mester para den solo, sin tent, y for di tempran. Tin algun habitante cu tabata t’ey pa mas dia.
Segun un habitante, Mariola Martilia, debi na e sistema cu a bay down, no tabata por a haci pago. Sinembargo awe, a cuminsa di nobo y finalmente a logra paga su plachi. E ta keha cu no tin nada poni pafo pa proteha e clientenan, ni un tent.
E habitante a expresa su frustracion cerca funcionarionan di DIMP. Nan tin di haci miho cu esey, ta su habitante.
Un otro habitante, Angel Every, a splica cu segun e ta saca afo di informacion cu el a haya for di basta hende, tin cierto reclamonan pisa. Awo Aruba ta den un situacion hopi dificil cu hendenan no tin trabao. Hendenan ta desespera pa pone cuminda riba mesa.
Awo, en bes cu gobierno haci’e mas facil, mas humano cu nan ta pretende cu e ser humano ta central, ta haci e carga di e ser humano mas pisa.
Gobiernonan ta priminti cu nan ta bay haci’e den cuater pago. Pero ora cu scoge nan, ta un storia completamente diferente.
Segun Every, bisando democraticamente, ta bay yega momento cu pueblo mester “boet” e Gobierno awo.
Ricky Slachter tambe ta un ciudadano cu tabata warda basta pa drenta pa paga su number di auto. Debi na trabao, e no por a haci’e mas trempan. E por bay online, pero no necesario. El a dicidi toch pa bay, pero no a spera un rij asina largo. Awo cu e cuestion di COVID ta hopi mas dificil pa por haci cierto pagonan den rij.
Online, segun Slachter, no ta bay haya e recibo di biaha, pasobra tin un delay riba recibo. E tin miedo pa su recibonan. Algo cu el a haya sa cu e tin cu warda tres siman pa e por haya recibo.
Un otro habitante, Romar Arango, a splica cu e kier coopera. El a splica cu el a mira den noticia di e ultimo dia di luna pa paga, asina ta cu el a bin paga cerca di e fecha aki. E mes no gusta uza computer. E ta prefera haci e pago en efectivo. E habitante aki tabata tin dos ora ta warda prome cu el a drenta. Segun e ta splica cu e no por haci nada.
Habitante Gabriel Kelly a splica cu ta parti di e situacion pa yega y para den rij. E ta calcula cu tur hende tin cu paga number di auto, pero e tin otro cos di paga y tin te fin di luna y ta p’esey e ta para eynan.
E ta sigui comenta cu tin hopi otro cos pa por soluciona e problema di rij. Den e sistema di Departamento di Impuesto, tin hopi hende cu IQ hopi mas halto cu por bin cu algo otro y por suavisa pa comunidad. Online ta e ultimo recurso e ta menciona.
Romana Croes, un otro habitante, a splica cu el a bay Paradera y tabata tin hopi hende y merdia a bis’e cu no ta duna number mas. Y su dia siguiente a bis’e na Paradera cu ta cierto cantidad di number so ta duna durante dia. Tin cu paga number di auto prome cu dia 1, sino ta haya boet.
Na Camacuri, nan a dun’e chens pa e por drenta, mirando cu e ta riba 60 aña. E ta pensa cu mester bin un otro areglo. Pero den un fila grandi, ningun hende no por paga.
