Su nomber mes ta Gilberto Toribio Arends, pero tur hende conoce como “Skere”, naci dia 29 di november 1946, pues tin 74 aña di edad. E tin algun tempo caba ta lucha cu su salud, pero awe pa mas of menos 1:00am, dokter a constata su morto na su mesun cas.
Skere Arends a yega di bira hopi malo, mas of menos 20 aña pasa. Pero, e tempo ey el a sobrebibi y pocopoco a regresa na su bida normal. Na memey di aña pasa, el a bira malo atrobe y a bay atras cu su salud, te cu el a cuminsa dialisa algun biaha pa siman. Pero 10 aña pasa el a bolbe confronta un reto cu su salud, ora el a haya un stroke. Atrobe el a pone un meta su dilanti y a lucha pa bira bon bek. Pero na final, awe marduga el a perde e guera contra e enfermedad y a dicidi cu e ta bay sosega.
Skere mes ta conoci como un tremendo bendedo. No tin nada cu Skere no por a bende. E tin un arte di por papia y convence hende, cu ta un “don” cu el a nace cu ne. E conoce hopi hende y como tal tin un red di amistad incomparabel. Esey a hacie masha exitoso den su trabounan como gerente di benta cu famia Mansur pa hopi aña largo.
Mas of menos 22 aña pasa, el a opta pa lanta su mesun compania. El a dedic’e na su tres yiunan y e compania ta inicial di nan prome nomber, esta GIANDA N.V. Skere a sigui cu locual e ta haci miho, bende productonan “por mayor” (wholesale) y asina a trece varios producto pa nos isla, di tur sorto. Kico cu bo pidie, e ta importa pa bo. Pero e ultimo añanan, el a stop di ta activo den e negoshi y a pas’e pa su yiu Andrew.
Na cas, como pensionado, ainda e no ta sinta keto. Skere a bira e ayudante principal di su casa Marjorie den trahamento di bolo. Nan ta conoci rond Aruba pa ta traha e miho bolo di “chateau” riba mercado. Nan a bira asina popular, cu Ling & Sons Supermarket a cera un acuerdo pa bende “nan” bolo di Chateau so, den forma exclusivo. Esey a haci cu e trabou na cas a bira preparacion di bolo, pa tur dia por entrega un cargamento fresco di bolo na e supermercado.
Pero Skere Arends no ta conoci solamente como un bon bendedo y comerciante, pasobra den su tempo liber e ta un musico “tur afo”. Skere a yega di produci varios cancion, entre otro, cu Padu del Caribe. Y den tur momento di entretenimiento, semper e ta cla pa saca un instrumento y percura pa alegria y ambiente. Asina mayoria hende conoce Skere, un persona cu semper tin un sonrisa riba su cara y cla pa conta bo un chiste of pone bo hari.
Victor Camacho:
“Si, Skere tabata un leyenda, el a graba un dobel Long Play cu canticanan di Padu del Caribe y tambe a toca 10 aña sigui pa Oranje Bal na Gobernador y tambe tur aña despues di tiro na cas di Blanche Eman-Hartogh. Laga nos no lubida su tumba di Carnaval e pen bieuw cu tanto el a hala atencion cu ne”.
Na su famia, su señora, yiunan, nietonan y tur cu stim’e tanto, nos ta expresa palabranan di condolencia y hopi forsa den e momentonan dificl aki. Cu Skere Arends sosega na paz.
