Diadomingo 12 di juni cu ta e fecha natal di Anne Frank e organisacionan di hobennan di AVP, Plataforma Hobennan Profesional (PHP) y Green Gen Z a organisa un conmemoracion pa corda e bida di un hobencita cu tanto mensahe y ehempel noble a laga atras.
E conmemoracion a habri cu un presentacion conmovedor di violinista Omar Kock cu presentacion di e Himno di Aruba y e instrumental di e conocido pelicula Schindler’s List. Representantenan di PHP, Wendrick Cicilia y Abigael Arends y hobenan di Generacion Z, Jeanyra Yarzagaray y Karyme Acosta acompanja pa hobenan di Arubaanse Padvindsters Gilde a duna tributo na Anne Frank cu un ceremonia di krans na su estatua.
Rabbi Baruch a comparti un oracion y mensahe den memoria di Anne Frank y e miyones di personan cu a perde nan bida durante segundo guerra mundial. Tambe a comparti e mensahe di e luz cu mester pasa di un pa otro pa ilumina nos caminda padilanti guia pa nos Creador.
Tabatin discursonan sumamente eloquente di Wendrick Cicilia y Abigael Arends y hobenan di Generacion Z, Jeanyra Yarzagaray y Karyme Acosta. Lider di Partido mr. Mike Eman a cera e conmemoracion cu un refleccion profundo riba e nececidad pa orienta nos mes atrobe riba creencia, fe, proposito di bida y amor prohimo. Mike Eman a enfatisa cu e pandemia a mustra mundo cu no tur cos ta den nos man, no tur cos por wordo calcula y dirigi. Tin forsa mas grandi, tin un necesidad pa nos ta consciente y humilde frente e realidad transcendental aki y tene asina na nos fe pa guia nos. E a mustra cu den tur e tragedia cu Anne Frank a pasa aden nunca e a perde speranza, pasobra su fe den Dios tabata grandi. Anne Frank su forsa pa supera tabata tambe den e amor y sosten incondicional di amistadnan. Mike Eman a bisa cu esaki tambe ta un leccion grandi di e historia di Anne Frank; amigonan incondicional cu a risca nan propio bida pa proteha y cuida otro prohimo. Un motivacion y ehempel pa nos tur, Eman a envatisa.
Rabbi Blasberg a duna e oracion di clausura cu e mensahe di con inspirativo e bida y ehempelnan di Anne Frank tabata ta cu ta awe nos por tene na dje. E bunita atardi-anochi a sera cu un cancion gospel conmovedor di Eltienne Yarzagaray.
