Manera cu Minister Ursell Arends a anuncia caba, dump di Parkietenbos a cera dia 31 di december ultimo.
Diamars, 3 di januari 2023, ta un dia cu hopi hende a reanuda trabou despues di e dianan di fiesta cu ya caba ta tras di lomba. Hopi ta esunnan cu a yega na porta di dump di Parkietenbos y haya e porta di cera. Y un di esunnan cu a yega na porta di dump tabata un di e ploegnan di Serlimar, cu no tabata sa unda pa bay cu e sushi cu nan a recoge for di nos cayanan.
Tabata sigur un experiencia amargo pa meneer de Kort, cu no tabata sa kico pa haci cu e sushinan cu nan a recoge for di un districto, cual tabata San Nicolas. Hopi di e bakinan di sushi ta yen , pa cual nan a bin dump pa bin tira e sushi cu nan tin caba pa asina sigui cu nan labornan.
Pero ora cu nan a yega na porta di dump, el a bin topa c’un porta cera y un guardia di siguridad para na porta cu tabata indica nan cu nan no por drenta. Segun de Kort, e no tabata sa cu dump ta cera entrante prome di januari. El a sigui bisa cu tabata tin hopi controlado di DOW cu tabata bin check e trabou cu nan ta desplega, pero niun di nan a bisa nan cu dump ta cera entrante 31 di december 2022.
Hopi ta esunnan cu a probecha e dianan di fiesta cu a transcuri, pa haci nan haci rond di nan cas limpi. Pero e problema, un biaha mas, ta sinta: unda nan mester bay cu e tur e sushinan aki, si dump ta cera? Un sabor amargo pa tur esunnan cu ta custumbra di bay hiba nan sushi na dump.
A pesar di ful un campaña di conscientisacion hiba pa e minister en cuestion, toch asina mes tabata tin hopi hende cu a bisa cu nan no tabata sa cu dump a cera.
