Aruba Tourism Authority kier anuncia oficialmente e promocion di Sjeidy Dijkhoff Feliciano como A.T.A. su Directora di Norte America. Den luna di juli 2022 Sjeidy a cumpli 20 aña na A.T.A. unda e a fungi den diferente rol y tawata encarga cu diferente proyecto importante incluyendo e Aruba Certification Program cu a lansa na 2011.
Durante e ultimo diesun añanan Sjeidy tawata e Communications Manager na A.T.A., encarga cu e aspecto di relacionnan publico pa Aruba y ‘influencer marketing’ den dies diferente mercado internacional cu e proposito principal di promove Aruba como destino turístico.
Durante e pandemia Sjeidy tawata encarga cu Aruba su strategia di comunicacion di crisis riba nivel global, un responsabilidad grandi cu el a sa di carga, sigui pa e strategia di comunicacion di reapertura, e proceduranan di salud y siguridad como tambe e rekisitonan pa bishitantenan.
Den su posicion nobo Sjeidy lo traha di cerca cu e operadornan di tour y e socionan di e mercado Norte Americano, y lo keda basa na Aruba. Esaki ta permiti cu e por mantene relacionnan estrecho cu socionan na Aruba tambe y asina traha riba strategianan beneficioso pa cu e necesidadnan di cada socio. E conocemento di turismo y e relacionnan cu Sjeidy a logra establece den su añanan na A.T.A. sigur lo contribui na desaroyonan positivo pa cu e mercado di mas grandi pa Aruba.
Como organisacion e ta sigur un placer y orguyo cu e posicion aki ta parti di un promocion interno unda un miembro di ekipo ta haya e oportunidad pa ta e directora di e mercado principal di Aruba. E ekipo completo di A.T.A. ta desea Sjeidy hopi exito den su rol nobo.
