Dos vehiculo destrui pero no tin hende deteni. Dos partido den confrontacion y no ta mira cu lo tin manera pa resolve e enemistad por lo pronto. Un problema cu ta bin ta andando pa basta tempo caba y cada biaha ta escala un poco mas.
E confrontacion y caso di destruccion aki a tuma luga den ora di marduga (2:00am) y na yegada a bin topa cu dos auto destrui y un tension halto di un banda pa otro. Ambos auto, un Honda accord blanco (A-2915) y un Ford shinishi (A-50272) para riba caminda dilanti Hotel na Palm Beach ( Holiday Inn ) cu windshield, hood y diferente otro daño mas na e autonan. E dañonan aki no ta relaciona unicamente cu un accidente pero mas bien ta intencional relaciona cu destruccion.
Varios patruya, tanto di Noord como di Playa a presenta pa asisti cu e situacion, mesora a atende un di e chauffeurnan y pon’e suela abou, como tambe e acompañante den e Ford shinishi cu man riba dak.
No a tarda mucho cu di e otro banda, propietario di e Honda accord a presenta pa indica cu ta trata di su vehiculo. Mientrastanto un di e contra partidonan a duna informacion na sitio cu ta trata di un hende conoci pa nan, cual nan tin problema serio cu nan. Segun a compronde, nan tin un ordo pa keda na un distancia (restraining order) cu ta haci cu nan no por ta cerca di otro. Pero ningun caminda e persona aki tabata presente na e sitio.
A indica cu muy probablemente e conoci aki lo ta e responsabel pa e destruccion, cu a tuma luga mas prome den area di Moomba Beach, segun version di e contra partido. Auto cu ta di e señora di e propietario na sitio, cu e yiu tabata cu ne e marduga ey. Propietario visiblemente altera y tirando basta menasa y ofensa den aire den su rabia.
Na final no tabatin detencion. A tuma dato di tur hende y lo laga e caso den man di e team investigativo.
