Ta parce cu e relacion entre e partnernan den coalicion no ta pasando dor di su miho momentonan. Asina por a nota cu cada bes cu partido RED tuma un decision, specificamente den enseñansa, cu mesora e partnernan MEP y POR ta lanta para. E ultimo tin di haber cu nombramento di ex abogado Edwin Duijneveld na Departamento di Enseñansa. Aunke cu mester bisa cu su postulacion a cuminsa prome cu eleccion mes y e ex abogado tabata un docente prome cu a bira hurista, toch e fraccion di MEP den Parlamento no ta contento ni tampoco integrantenan di POR. Nan no a logra mantene nan rabia internamente tampoco y ta opta pa expres’e publicamente riba red social.
Asina por nota cu na momento cu a pensa den independisa Dienst Publieke Scholen (DPS), cu esaki a causa tanto problema den coalicion cu a obliga Minister Lampe pa parkeer e plan aki. Despues a nombra un miembro yega na partido RED como Director nobo pa DPS, cu tambe a causa problema den coalicion. Awor a toca turno na e nombramento di Duijneveld pa bira un problema entre e tres partidonan cu hunto ta forma Gabinete Wever-Croes.
Fuentenan den Parlamento a indica na nos cu esey ta los di e discusion cu por poco a bay for di man den sala di reunion di Parlamento e siman aki, durante un reunion di Comision Central cu Minister Chris Romero. Parce cu e ultimo aki a presenta cu Luigi Bergen como su Consehero den e reunion cu Parlamentarionan. Pero despues di e reunion, lider di fraccion di RED, Ricardo Croes a para Bergen formalmente, cu grito y hincamento di man den cara di otro, relaciona cu un hacimento di redashi di Bergen riba Croes. E tipo di confrontacionnan asina no ta yuda pa drecha e relacion di RED pa cu su dos partnernan MEP y POR.
Den prensa por a scucha ayera na radio, con tabatin critica pisa contra Otmar Oduber, cu den un comunicado cu su Ministerio a manda, a skirbi cu el a bishita Raad van State como Vice Prome Minister di Aruba. Corectamente e presentado di noticia a critica Minister Oduber pa esaki, pasobra cada biaha atrobe e ta publica den e medionan di comunicacion yega na dje, of cu e ta controla, cu e ta Vice Minister Presidente. Mester ta cla pa tur hende cu e funcion ey ta drenta na vigor na momento cu e Minister Presidente ta di biahe of ta AO. Tanten cu Minister Presidente Wever ta na Aruba, ningun otro por uza e titulo aki. Esey ta conta tambe pa Parlamento. Den seno di MEP tambe e critica aki ta lantando, cu Oduber ta purba tur dia bay pa “outshine” Wever via esfuersonan di relacionnan publico.
Movimiento Electoral di Pueblo (M.E.P)
Funda: 9 di Februari 1971
Funda door di: Gilberto F. “Betico” Croes
Lidernan desde fundacion: Gilberto F. “Betico” Croes, Nelson Oduber, Evelyne Wever-Croes
Cuanto biaha a participa den eleccion: 17
Record maximo di voto: 25,172 (2001)
Record minimo di voto: 8095 (1973)
Eleccion 2017: 22,061
Ideologia: Social democrata
Red Eternal Democratico (R.E.D)
Funda: 30 di Mei 2003
Funda door di Armando “Rudy” Lampe
Lidernan desde fundacion: Armando “Rudy” Lampe (2003-2016) & Ricardo Croes (2016)
Cuanto biaha a participa den eleccion: 3
Record maximo di voto: 3330 (2005)
Record minimo di voto: 1209 (2013)
Eleccion 2017: 4166
Ideologia: Progreso
Pueblo Orguyoso y Respeta (P.O.R)
Funda: 11 di December 2016
Funda door di: Otmar Oduber
Lidernan desde fundacion: Otmar Oduber (2016)
Cuanto biaha a participa den eleccion: 0
Record maximo di voto: 0
Record minimo di voto: 0
Eleccion 2017: 5531
Ideologia: Transparente, progresista
