Cuater aña despues Darrely Rivera por cera un capitulo doloroso den su bida, manera e mes a informa riba su pagina di Facebook. Su ex-casa y tata di su yiu, a haya un castigo cu pa resto di su bida lo lag’e corda kico el a haci cu nan yiu R.J. di apenas tres aña di edad. E castigo ta sin derecho riba libertad condicional.
Frederick “Rudy” Franken tabata un taxista tempo cu el a biba na Aruba y despues a bay Merca. E tabata casa cu Darrelly Franken di 38 aña di edad, “airman first class” trahando cu 96th Maintenance Group”. Nan tabata biba na Florida.
Dia 15 di maart, 2019, e mama di e menor a yega cas (Bluewater Bay) for di trabou y a topa cu e curpa di su yiu na suela, banda esun di su casa y tata di e menor di 3 aña. Ambos tabatin marcanan di hinca. A bin sali na cla cu Franken a hinca e yiu varios biaha y despues a trata di mata su mes, cu varios hinca, pero no a logra.
Fiscal di Estado inicialmente a bisa cu nan lo busca castigo den forma di pena di morto pa Frederick Rudolph Franken, Sr. riba cargo di asesinato premedita. A lanta e acusacion contra dje dia 8 di april 2019. Franken mes no a declara su mes culpabel di e delito.
E mama di e menor a declara e tempo aya na polis cu nan tabata pasando den poco problema matrimonial pa cual el a bisa Franken miho nan divorcia. Autoridad a bisa cu e dia di e sucedido e pareha tabata den combersacion te rond di 3:00 pm. Henter dia e tabata manda potret di nan yiu pa su casa. Tambe el a saca tur placa for di nan cuenta di banco y a post un pakete (cu su celular) pa su yiu muhe na Aruba.
Despues di esey, el a bay cas y a hinca su yiu prome cu el a uza e cuchiu riba su mes. “El a drumi na suela banda su yiu pa su casa bin haya nan asina,” ta para den e documentonan di Corte.
