Cualkier momento ta bon momento pa reconoce un persona pa su meritonan y contribucion na comunidad, e honor aki a toca Mathilda Wijnaar na su edad di 88 aña.
‘Hartelijk dank’, ‘gracias’, ‘grantangi’, ‘terima kasih banjak’, ‘obrigado’, masha danki; cualkier idioma cu nos uza pa expresa gratitud ta falta peso pa ilustra e sentimento cu ta compañ’e.
P’esey na nomber di nos tanta, Mathilda Wijnaar, nos kier bisa cu ta cu sentimento profundo di amor, respet y aprecio nos ta gradici pa e condecoracion aki.
E reconocimento publico aki di nos tanta, tanto pa su dedicacion na educacion en general y su interes den formacion di cada studiante na Aruba sin distincion, como su interes y atencion pa nan bienestar general, lo keda ancra den memoria di esunnan cu el a touch nan bida.
Storia di su bida lo ta inspiracion pa cada ken cu les’e.
Contrario na loke nos a pensa y spera pa motibo di su retonan di salud, Tanta Mathilda lo no tabata Tanta Mathilda si e no a haci su maximo esfuerso pa personalmente ricibi su condecoracion for di man di su Excelencia Gobernador Alfonso Boekhoudt, nos ta duna tur gloria y honor na Dios p’esaki.
Nos ta expresa nos sincero gratitud na prome luga na Dios pa a duna nos tanta e talento y capacidad pa eherce su debernan como educador tanto den klas, como pafo di esaki.
Nos ta expresa nos sincero gratitud na Su Excelencia Rey Willem- Alexander pa acepta e proposicion pa e Condecoracion Real aki.
Nos ta gradici e comision organisado pa a entrega e proposicion keriendo den e trabou cu nos tanta a haci durante su añanan trahando y tambe despues di a retira.
Por ultimo, pero no menos importante nos ta gradici tur persona cu na un manera of otro a yuda haci e condecoracion aki posibel.
