Tin hopi hende indigna pa loke ta trata e manera cu Gobierno a trece e ROP padilanti y famia Figaroa, ta un di esnan cu sigur a trece un carta di obhecion referente na esaki.
Sr. Pedro Figaroa a splica cu awe, diabierna, 15 di Maart tabata e ultimo dia cu por a entrega un obhecion riba e concepto di ROP.
Pakico
Figaroa a conta cu ta trata aki di dos tereno cu hunto ta casi 15 hectaria. E terenonan aki ta situa na Anabui. Anabui ta keda p’ariba di faro. E problema ta cu den e concepto e tereno aki ta wordo destina como natuurgebied. Un tereno den natuurgebied, nan desaroyo ta masha limita.
Por ehempel no ta posibel pa eherce un verkaveling. Tambe lo ta dificil pa bende e tereno. Ta un tereno basta grandi aki. Como tal e herederonan ta wordo perhudica di nan interes. Ta pa e motibo aki mes a bin entrega un obhecion contra e concepto cu e peticion pa cambia e concepto di tal manera cu ta permiti pa construi cas, etc. Si mira den e cuestion aki por mira Tiera del Sol. Un parti di e tereno mas grandi, tin un border hunto cu esun di Tiera del Sol. Awo e pregunta ta dicon cerca Tiera del Sol desaroyo si ta posibel, pero cerca e herederonan no.
Den pasado inversionistanan a acerca e herederonan pa bende e tereno. Pero como cu e posicion di e terenonan ta mucho limita, e ora ta dificil pa bende. Mientras tanto loke nan tabata tin den mente ta cuadra cu e desaroyo cu a tuma luga na Tiera del Sol.
E pregunta cardinal ta cu loke e concepto di ROP ta boga, si e ta asina importante, con e ta permiti cu ta atacha e interes di e herederonan pasobra cu destinacion di natuurgebied, casi no por haci nada riba dje.
No ta solamente pa cambia e destino, pero a bisa tambe pakico. Tin tres punto di atencion.
E prome punto ta Anabui ta keda p’ariba di faro. Antes Anabui tabata un luga bandona. Casi no tabat topa hende mas. Awendia ta otro. E ta wordo frecuenta intensivamente pa turista. Antes tabata tin un colonia di meeuwtji, y esey no tey mas. Tambe ta asina, segun informacion cu a ricibi for di DIP, parce cu eynan tambe tin un habitat di shoco. Awo, si e shoconan tey ainda, ta e pregunta.
Un otro punto ta cu e area di Anabui, ta tapa manera cu tapijt di yerba, brakgras. Si wak awor aki, ta mira basta parti bashi. Posiblemente causa door di vehiculonan motorisa, por ehempel quadracers. Tambe ta asina cu barancanan a disparce. Por bisa cu tin un deterioro di naturalesa. E pregunta ta, ta keda algo di naturalesa?
Un otro punto ta cu e herederonan ta di opinion cu e destinacion di e parcelanan como natuurgebied, ta en pugna di e redelijkheidsbeginsel. Un di e preocupacion di mas grandi ta cu nan tin un frontera comun cu Tiera del Sol. Pa Tiera del Sol, a tuma full un desaroyo di cas, di atraccionnan di turista. Pakico nan si ta permiti y pa e herederonan si no ta permiti.
Figaroa a splica cu e pregunta cardinal ta keda, si loke e natuurgebied ta boga, si esey ta asina importante cu tin cu perhudica e interes di e herederonan. Mientras tanto cu nan ta pidi pa un desaroyo di nan tereno, mescos cu e desaroyo cu a tuma luga caba na Tiera del Sol.
Di tres punto ta, cu si mantene e idea manera e ta actualmente, esey ta atacha e derecho di propiedad manera e ta ancra den constitucion. Ademas e ta nifica un gran daño pa e herederonan.
Dado momento gobierno, ta logico cu e ta duna placa, of algo pa e daño. Pero sa cu gobierno no tin cen. Gobierno no ta disponibel pa cumpra e tereno. No tin disponibilidad pa duna un otro tereno na su luga. No tin ningun posibilidad pa paga un daño y perhuicio. Articulo 3 di e LRO, ta paga di compensatie. Pero prome cu regla esey, añanan largo lo pasa. No ta asina asina ta hinca un ley den otro.
Esey ta nifica cu no tin ningun garantia di un schadeloos stelling regeling na e momento aki. Bida ta sigui, segun Figaroa y e herederonan ta sigui tambe. Pero dado momento tin cu warda ainda. Mayoria di e herederonan ta di edad halto. Ki dia gobierno ta bin cu un schadeloosregeling. Esey lo bay dura largo.
Mirando tur e tres puntonan tocante e tereno di Anabui, tocante ta permiti na Tiera del Sol y loke no ta permiti cerca e herederonan y di tres, cu gobierno no kier organisa un schadeloosstelling. E herederonan ta urgi gobierno enfaticamente pa cambia e concepto di ROP den tal sentido cu e ta permiti e herederonan pa nan por desaroya. Al fin y al cabo tambe pa tin e posibilidad cu por bin cu verkavelingsplan. Esey ta loke urgi gobierno, pa nan no mantene e destino pa natuurgebied, pero cambi’e. Asina nan tin mas posibilidad pa desaroya of laga desaroya e terenonan cu ta cuadra cu e desaroyo cu den cercania a tuma luga.
