“Tin hopi cos in place na Aruba pa evita y soluciona situacionnan alarmante pa cu nos muchanan”, asina Lenny Geervliet, experto riba tereno social a duna di conoce awe mainta. Su comentario ta bin despues di fayecimento di e criatura di 5 aña ayera, probablemente dor di maltrato y tortura pisa. Su comentario ta: “Nos a faya mahos y esey ta haci hopi dolor”.
Lenny Geervliet a studia na academa social na Universidad di Arnhem, na Hulanda. E ta ex Director di Departamento pa Asuntonan Social y tabata hefe di e departamento di “Ouderenzorg” na Directie Volksgezondheid Aruba.
El a cuminsa na puntra su mes, “Nos tin leerplicht…scol no a ripara nada preocupante?”. Esaki sigur ta un pregunta valido pasobra parce cu e victima tin marca di kemadura di awa cayente, brasa kibra, bekken lesiona, ribchi kibra of gescheur. Mayoria di e lesionnan aki no ta fresco, pues ningun hende a nota esaki? Ki mishi un mucha ta yega scol cu tanto marca y lesion y docentenan no ta ripara y/of bati alarma na instancianan concerni?
E otro observacion di e experto riba tereno social ta cu si bisiñanan, famia of otro hende rond, niun a nota nada cu ta di preocupacion? Instancianan cu a conoce e mayornan aki, cu tabata sa di nan manera di biba y nan incapacidad pa cuida of educa nan yiunan, ningun a nota nada?
“Mayornan aki ta responsabel na prome luga….SIGUR….pero por fabor….tin hopi mas! Si bo ta preocupa pa un mucha cu ta pasa den un situacion asina, NO DUDA…tin Bureau Sostenemi unda Bo por comparti Bo pensamentonan, Bo inkietud, Bo preocupacion, nan por yuda pensa y analisa kico por haci. Tuma accion si Bo ta preocupa pa un mucha”, asina Lenny Geervliet a indica.
Na final el a subraya cu “Miho 100 biaha por nada cu 1 biaha mucho lat. Stop di culpa otro tur rond, ban tuma y carga NOS responsabilidad pa NOS comunidad y actua ora nos sinti cu tin mester….sin miedo, toch? Wel, sin miedo tambe ora nos mester sali na defensa di nos muchanan!”
