Indice di Prijs di Consumo pa luna di juni 2021 ta 98.09, loke ta representa un subida di 0.7% compara cu e indice di mei 2021 (97.39) y acumulando un subida di 1.1% te cu na juni di e aña aki. E cambio di e CPI pa e ultimo diesdos (12) lunanan (juni 2020 te cu juni 2021) ta 1.0%, un subida di 3.9 punto di porcentahe (ppt) compara cu e periodo corespondiente di aña pasa (-2.9%).
E promedio anual di inflacion pa e periodo di juni 2020 te cu juni 2021 ta -1.8%, un caida di 3.8 ppt compara cu e 2.0% registra den e periodo di juni 2019 te cu juni 2020. Durante e luna aki, seis (6) di e diesdos (12) sectornan a registra subida di prijs. E subidanan cu tabata tin e mayor efecto riba e CPI a registra pa e sectornan di “Transporte” (2.8%) y “Mobilario” (3.1%), causando un efecto di 0.36 y 0.28 ppt. E subidanan den e restante sectornan a contribui cu un efecto di 0.30 ppt riba e CPI di juni 2021.
E subidanan aki a contraresta parcialmente door di caida den e indice di e sectornan di “Comunicacion” (-1.0%) y “Restante bienes y servicio” (-0.6%) cu a contribui cu un efecto di respectivamente -0.09 y -0.07 ppt riba e CPI di juni 2021. E caidanan den e restante sectornan a contribui cu un efecto di -0.06 ppt riba e CPI di juni 2021. E subida den e sector di “Transporte” causa pa principalmente un subida di 2.6% den e categoria “Gasto relaciona cu uzo di vehiculo di transporte personal”, causando un efecto di 0.14 ppt. E subida den e sector di “Mobilario” a causa principalmente door di un subida di 15.0% den e categoria “Aparato pa uzo domestico”, causando un efecto di 0.33 ppt.
E caida den e sector di “Comunicacion” causa door di un caida di 22.5% den e categoria “Ekipo di telefon y fax”, causando un efecto di -0.09 ppt. E caida den e sector di “Restante bienes y servicio” causa door di principalmente un caida di 6.2% den e categoria “Otro articulonan personal”, causando un efecto di -0.06 ppt.
Canasta di consumo
E canasta di consumo di e CPI ta consisti di 408 bienes y servicio. Compara cu mei 2021, 47.5% di e bienes y servicionan aki a conoce un aumento di prijs causando un efecto di 1.39 ppt, mientras cu 36.5% ta mustra un caida di prijs, cu a contribui cu un efecto di -0.68 ppt y pa e restante 15.9% no tabata tin cambio den prijs. Prijsnan di bienes a subi cu 0.6% y a causa un efecto di 0.37 ppt. Prijsnan di servicionan a conoce un subida di 0.8% y a causa un efecto di 0.34 ppt riba CPI di juni 2021.
Core inflation
E CPIC (core inflation) – CPI excluyendo e efecto di energia y cuminda – a registra na juni 2021 un caida di 1.6%. E indice di energia – cu ta consisti di e productonan: electricidad, awa, gasolin y diesel a registra un caida di -2.4%. E indice di cuminda a registra un caida di 2.5%.
Bestaansminimum
E bestaansminimum pa un hogar consistiendo di dos (2) adulto y dos (2) mucha (edad 0-15 aña) na juni 2021 ta Afl. 4,770, un caida di Afl. 12 compara cu juni 2020 (Afl. 4.782). E bestaansminimum pa un hogar di un (1) adulto ta Afl. 2,271, un caida di Afl. 6 compara cu juni 2020 (Afl. 2.277).
Energia: Electricidad, awa, gasolin y diesel.
E nivel minimo di entrada cual ta wordo percibi cu ta necesario pa logra mantene un nivel di bida adecuado.
Cambio di prijs di petroleo, utilidad, gasolin y diesel na juni 2021
Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na juni 2021 e prijs promedio pa bari di petroleo (US$ 70.97) a conoce un subida di US$ 5.80 (8.9%) compara cu mei 2021 (US$ 65.17).
Prijs di electricidad y di awa no a cambia compara cu mei 2021. Consecuentemente, e prijs promedio di electricidad pa vivienda a keda Afl. 240.09, mientras cu e prijs promedio di awa pa vivienda a keda Afl. 137.05.
Prijs di gasolin a registra un subida di Afl. 3.70 cent (1.7%) na juni 2021 y a causa un efecto di 0.08 ppt riba e CPI. Prijs di diesel a registra un subida di Afl. 8.40 cent (4.8%) na juni 2021 y a causa un efecto di 0.01 ppt riba e CPI.
juni 2021, utilidad, gasolin y diesel como grupo, tabata tin un subida di prijs di 0.6% compara cu mei 2021 y hunto tabata tin un influencia di 0.09 ppt riba e CPI, mientras cu e restante 404 bienes y servicio hunto, a conoce un subida di prijs di 0.7% tabata tin efecto un efecto di 0.62 ppt riba e CPI.
Cambio di prijs di Cuminda y servicio di catering na juni 2021
E indice di “Cuminda & servicio di catering” a registra un subida leve di 0.03% na juni 2021, despues di un subida di 0.2% na mei 2021. E indice di “Cuminda na cas” (-0.1%) a registra un caida, unda ocho (8) di e diesun (11) indicenan di e gruponan di cuminda na cas a baha na juni 2021. E indice di “Batata, yuca y batata dushi” a conoce e caida di mas grandi (-9.2%) na juni 2021. E indicenan di “Fruta” (-1.2%), “Sucu, jam y otro tipo di cos dushi” (-0.5%), “Restante productonan pa alimentacion” (-0.5%) y “Berdura” (-0.2%) tambe a registra caida.
E indice di “Carni” (0.8%) a registra e subida di mas grandi na juni 2021. Ademas, subidanan di 0.4% y 0.1% a wordo registra den e indicenan di “Azeta y otro productonan traha di vet” y “Bebida no-alcoholico”, respectivamente.
Den e ultimo diesdos (12) lunanan e indice di “Cuminda & servicio di catering” a baha cu 0.5%. E indice di “Cuminda na cas” a conoce un caida di 1.2%. E indice di “Batata, yuca y batata dushi” a baha cu 14.3%, e caida di mas grandi entre e gruponan di cuminda na cas, mientras cu e indice di “Lechi, keshi y webo” a subi cu 1.7%, e subida di mas grandi entre e gruponan di cuminda na cas.
E indice di “Cuminda pafo di cas” a subi cu 0.3% na juni 2021 y a registra un subida di 1.0% den e ultimo diesdos (12) lunanan.
Na juni 2021, “Cuminda na cas” y “Cuminda pafo di cas” como grupo, tabata tin un subida leve di prijs di 0.03% compara cu mei 2021 y hunto tabata tin un influencia insignificante riba e CPI, mientras cu e restante bienes y servicio hunto a experencia un subida di prijs di 0.8% y tabata tin un efecto di 0.71 ppt riba e CPI.
Bestaansminimum na juni 2021
E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo uza pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0-15 aña). E bestaansminimum ta basa riba cifranan di e rapport “Bestaansminimum 2010” cu CBS a publica na December 2010 y ta wordo actualisa mensualmente pa cu inflacion uzando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).
Na juni 2021 e bestaansminimum mensual pa un hogar cu ta consisti di dos (2) adulto y dos (2) mucha (edad 0-15 aña) (Afl. 4.770) ta mustra un caida di Afl. 12 compara cu juni 2020 (Afl. 4.782) y a wordo causa principalmente door di un caida di Afl. 26 den e sector di “Paña y sapato”.
Na juni 2021 e bestaansminimum mensual pa un hogar cu ta consisti di un solo adulto ta Afl. 2.271, cual ta representa un deficit di entrada di Afl 456, un caida di Afl. 95 compara cu e deficit observa un aña pasa (Afl. 551). E deficit aki ta e di dos mas abou registra den un periodo di cinco (5) aña pa luna di juni.
