Actualmente Aruba ta enfrentando un situacion economico desafiante cu e hiperinflacion temporal cu ta afectando nos isla. Gobierno a anuncia un impuesto di BBO di 7% na frontera riba importacion, cu a causa panico den poblacion. E subida aki di belasting a conduci cu hopi comerciante a aumenta nan prijsnan den anticipacion di e aumento di belasting na caminda, pero ainda nos no ta na juni, resultando den un aumento acelera di inflacion.
“Tur diasabra mi ta bishita e supermercadonan local pa cumpra loke mi mester pa Aruba Experience Cafe. Den 1 siman, e caha di pecho di galiña ( chicken breast) a bay di 70 florin pa 117.50 florin. Asina tanto? Si!!! Con mi ta traduci e prijsnan aki pa mi clientenan? E 2.26 florin pa kilo di yuca cu mi a cumpra siman pasa na 13 florin pa e mesun paki, mesun marca ta costa awe 20 florin. E prijs pa 30 webo tabata 18 florin y awo a subi pa 29 florin. E aumentonan aki ta bin riba di e aumentonan ya caba halto di e ultimo lunanan. E prijs di carni ta ridiculo te na e punto cu mi mester haci un menu nobo casi tur siman, pasobra mi modelo di negoshi ta un cafe cu ta sirbi desayuno y lunch…realmente mi no por paga pa traduci e prijsnan actual”, asina Susan Arias, propietario di Aruba Experience Cafe and Patisserie a publica riba su pagina di Facebook.
Pero cu e BBO nobo…
Hiperinflacion ta un situacion unda e prijsnan ta subi rapidamente y for di control, conduciendo frecuentemente na perdida di confiansa den e moneda. Esaki por tin un efecto catastrofico riba economia y e hendenan di e pais afecta. Actualmente Aruba ta enfrentando un hiperinflacion, cu e costo di e productonan y e servicionan a subi drasticamente den e lunanan recien. E decision di gobierno pa introduci e belasting di BBO riba importacion di 7% solamente ta añadi mas ainda na e problema.
Por sinti e impacto di e subida di belasting aki riba henter e isla. Hopi negoshi ta pasa trabou pa enfrenta e aumento repentino den e gastonan y consumidonan ta haya mas dificil pa paga pa e necesidadnan basico. Nos yiunan di tera ta sinti e aumento den prijsnan y esaki tambe a conduci na un disminucion den confiansa di consumido, ocasionando un caida den actividad economico.
E decision di gobierno pa introduci e belasting di BBO riba importacion ta haci den un intento pa atende cu e deficit di presupuesto di e pais, causa pa gasto excesivo di gobierno. Sinembargo, e decision aki solamente a empeora e problemanan economico cu e pais ta enfrentando. Cu e negoshinan y e consumidonan luchando, gobierno mester tuma accion rapido pa atende cu e situacion.
“Un di mi preocupacionnan mas grandi como doño di un negoshi chikito ta e impacto di e aumentonan di costo riba mi liña di fondo (hunto cu costo di utilidad, costo di salario, costo di mantencion y mas). Cu e margennan di ganashi ya caba estrecho, e aumento aki den e gastonan tin un impacto significante riba mi habilidad pa mantene mi mes den negoshi. E anuncio aki di 7% di aumento den belasting di importacion ta conduci na e prijsnan localmente halto aki di e productonan y e servicionan cu mi ta uza pa mi negoshi, cual na su turno ta conduci na un disminucion di cliente y entrada. Siguramente, esaki ta e bos di hopi, sino, tur e doñonan di negoshi chikito na Aruba.
E BBO riba importacion cu a anuncia ta bin ariba di e aumentonan di belasting desde di 1 di januari 2023, pa nombra algun:
- Aumento di 1% BBO
- Belasting riba e servicionan electronico
- Aumento di 3% di e tasa turistico
- Eliminacion di e pensioen in eigen beheer pa e doñonan di negoshi chikito
- Limitacion riba depreciation di propiedad inmobiliario.
Ademas, e aumento di belasting probablemente lo tin un impacto riba empleo. E negoshinan chikito ta frecuentemente e columna vertebral di e economia local. Esaki por tin un domino effect den henter e comunidad, conduciendo na un disminucion den e gastonan y un presion adicional riba e economia local.
Un solucion por ta pa inverti den produccion local pa reduci e dependencia di e pais riba importacion. Esaki no solamente lo yuda pa reduci e carga di belasting di importacion pero tambe crea trabou y stimula e economia. Adicionalmente, Gabinete Wever-Croes II por considera pa brinda apoyo financiero na e negoshinan cu ta pasando dificultad y reduci e carga di belasting riba e consumidonan. Un medida masha importante lo ta pa reforma e belasting acumulativo di BBO pa un sistema di VAT.
E BBO riba importacion basicamente ta añadi un capa adicional den e proceso di produccion na Aruba, causando un aumento di prijs di al menos 7%. Un sistema di VAT no tin e efecto aki pasobra VAT ta completamente deducibel, cu excepcion di e consumido final. Aunke algun compania por deduci e BBO di importacion, gobierno no ta tuma na cuenta e efecto psicologico di e BBO di importacion y e tendencia di e empresarionan pa cuminsa aumenta e prijsnan prome cu e BBO riba importacion ta introduci.
Den conclusion, Aruba actualmente ta enfrentando un clima economico desafiante cu hiperinflacion y un aumento significante den belasting di importacion. Esaki a conduci na un aumento drastico den prijs, haciend’e dificil pa e negoshinan y e consumidonan enfrenta. Gobierno mester tuma accion rapido pa atende cu e situacion pa preveni un caida adicional den nos economia. Door di inverti den produccion local, brindando apoyo financiero na e negoshinan y reduciendo e carga di belasting riba consumidonan door di introduci un BTW (VAT), gobierno por yuda pa stabilisa e economia y restaura confiansa den e sistema financiero di e pais.
