Mirando despues di e listanan largo cu tabatin pa loke ta Respaldo, AZV, Hunto cu Rampenbureau a pone un presupuesto disponibel pa por a bin cu un proyecto, caminda cu lo por a yuda mitiga e lista di espera aki pa Respaldo.
Segun Dalgis Montalvo, kende ta miembro di directiva di Stichting Hunto, encarga loke ta ambulante basiszorg, for di juni aña pasa, e proyecto aki a cuminsa. Tin di bisa cu ta un proyecto cu no ta propaganda, pero si despues di un aña por a mira e necesidad di e proyecto aki por a presenta e cifra y resultado di e proyecto aki, cu e idea pa mira si esaki ta uno cu lo mester keda si of no.
Montalvo ta sigui splica cu mester a link e proyecto aki directamente cu un sistema di registro digital, caminda cu por a saca cifra. E ora a presenta e rapport aki, caminda cu ta duna cifra ki edad t’esunnan cu mas a bin padilanti, cua districto tabatin persona cu mas a bin pidi ayudo.
Por a saca dato cu por duna un base si e proyecto aki mester keda si of no. Den cuadro di esey Montalvo a splica cu te cu 25 di april, tabatin un total di 570 caso manda pa Stichting Hunto for di dokter di cas.
Tin di bisa, mirando cu ta un proyecto cu ta financia pa AZV, tur caso mester a drenta for di un dokter di cas. E rapport cu a saca tabata te cu maart 2023. Despues e momento ey tabatin un total di 434 caso cu a drenta y tin di bisa cu edad cu mas a bin padilanti tabata edad entre 15 y 25 aña. Ta 75 caso den e edad aki cu a drenta.
Tabatin e di dos grupo mas halto cu tabata di 16 pa 20 aña, cu 56 caso di e edad aki cu a bin. E di tres tabata e grupo di 6 pa 10 aña cu 43 caso. Por ultimo tin edad di 36 pa 40 aña, cu 32 adulto. Esey t’e edadnan cu mas a bin dilanti. Por mira e ora cu edad di 16 pa 20 t’e cantidad mas halto. E problematica ta mas tanto concentra riba mucha, tiener y adulto hoben.
E peticion pa ayudo ta hopi halto. Segun Montalvo esey ta algo cu tanto e disciplina cu ta encarga pa traha e rapport aki, basa riba dato como tambe kico e psicologonan a haya. Hopi di e problematica tabata cu tin hopi frecuencia di adulto canando rond cu trauma di tempo cu nan tabata mucha of edad hoben, cu no a trata.
E persona aki lo por tin problema pa por relaciona su mes cu otro hende, problema of trauma relaciona cu abuso sexual, negligencia, negligencia emocional tambe.
