Diasabra, 29 di februari, varios miembro di e comunidad Dominicano residencia na Aruba, a bin hunto riba plaza Juan Pablo Duarte na Playa pa asina mustra nan mal contento pa loke ta e cancelacion di e eleccionnan municipal na Republica Dominicana.
Nan a manifesta cu nan bandera den man y mustra publicamente nan disgusto pa e proceso cu a tuma luga no mucho dia pasa.
Un di e manifestantenan a comenta cu dia 16 di februari ultimo, e eleccionnan congresional y municipal a keda cancela y ningun hende no a bisa nada.
Un otro a comenta cu riba e fecha ya menciona, cu un sistema automatisa di voto cu nan no tabata consciente cu a traha. Nan a cuminsa core e sistema y esaki no a duna resultado. Un cantidad di recurso a wordo benta afo, mas di 18 miyon di peso Dominicano. E pueblo tabata atento, tabata puntual den e eleccionnan, pero no tabata tin eleccion.
Despues di esey, a propone eleccion pa dia 15 di maart, cual mester destina e mesun cantidad di placa pa realisa e eleccionnan. Pero e pueblo no ta confia den e actual hunta, pasobra ya nan no ta duna garantia cu e voto lo wordo respeta.
E manifestacion a wordo haci como protesta pa e situacion aki cu a sosode ya den varios parti na mundo y den otro paisnan nan a haci e mesun manifestacion, como reclamo pa autoridadnan renuncia. Tambe pa renuncia e suplentenan, pasobra nan tambe ta pertenece na e mesun coriente.
Loke cu e manifestantenan kier ta un garantia cu lo conta e votonan un pa un y esun cu saca mas voto ta gana.
Dia 15 di maart Republica Dominicana lo bay tin un biaha mas nan eleccion.
