A nomina Colombia como un di e miho destinonan di mundo den e World Travel Awards (WTA), considera como e “Oscar di turismo”, unda cu tambe e lo competi den otro nuebe categoria como “Destino di Beach Lider di Mundo” of “Destino Culinario Lider na Mundo.”
“Laga nos vota pa Colombia den e World Travel Awards! Nos ta sigui posicionando como un destino sostenibel, confiabel y di calidad halto, danki na e beyesa di nos beachnan, cultura y infrastructura pa ta sede di eventonan internacional,” e presidente di e agencia di promocion ProColombia, Flavia Santoro a afirma.
El a agrega: “Na mundo ta sigui reconoce nos potencial como destino turistico di nivel halto y ta ricibi e 10 nominacionnan aki na nivel global den e premionan conoci como e “Oscar di Turismo”, ta motiva nos ainda mas pa traha incansablemente pa e industria aki cu ta clave pa e recuperacion economico di nos pais.”
Den e categoria di “Destino lider na mundo,” Colombia ta nomina pa di dos aña consecutivo y lo competi cu Brasil, India, Grecia, Malasia, Sri Lanka, Spaña y Chile entre otro paisnan.
“Ta emociona nos y ta yena nos di orguyo cu ProColombia tambe ta reconoci y ta nomina den e categoria di Oficina di Turismo Lider na Mundo,” Santoro a añadi.
Igualmente e pais lo competi pa ta e “Destino culinario lider na mundo,” mientras cu varios ciudad Colombiano a ricibi nominacion den otro categorianan.
Un di nan ta e isla Caribeño di San Andres, cu ta ilustra pa ta e “Destino di beach lider na mundo,” como tambe Bogota cu ta busca pa ta e “Destino di biahenan di negoshi lider na mundo”; Medellin, nomina na “Destino di escapada urbano lider na mundo y Barranquilla y Cali como “Destino di ciudad cultural lider na mundo.”
World Travel Awards ta e premionan di mayor prestigio dentro di e sector turistico na mundo y ta reconoce desde 1993 e excelencia den e universo di biahe y horeca.
