Diabierna Colegio Sagrado Curason tambe lo celebra Dia Nacional. E tema p’e aña aki cu nan a scoge ta ‘Yiunan di tera y di lama’.
Docente suplente na Colegio Sagrado Curason, Angelo Angela a splica e motibo pa cual nan a bin cu e tema aki. ‘Yiunan di tera y di lama’ ta papia di e conexion cu e pueblo di Savaneta tin cu lama. E celebracion ta encera presentacion special di e alumnonan y tambe lo tin presentacion di e bandanan invita. Rib’e anochi aki lo tin tambe benta di cuminda y artesania.
Meta di e celebracion aki ta pa e comunidad di Savaneta bin hunto, participa na cultura y specialmente p’e alumnonan di e scol pa stimula nan participacion na nos cultura aki. Presentacion di e alumnonan ta basa riba e tema ta pa e maestronan busca kico tin di literatura existente den canto y poema, pa nan por haci nan presentacion riba nan, pa siña e muchanan cu esaki ta locual nos tin, locual nos mesun hendenan a crea y awo ta duna un propio interpretacion di dje. E anochi aki tin un klas cu lo bin c’un poema y presetancion original. Docente Angela ta invita comunidad di Savaneta y pueblo di Aruba en general pa bin celebra hunto cu nan na Colegio Sagrado Curason, un anochi yena cu presentacion, cuminda y alegria.
Pa diabierna awo, e evento lo ta completamente gratis! Bin cu stoma bashi, ya cu lo tin diferente stand di cuminda cu lo tin benta di cuminda crioyo, tambe e snacksnan crioyo y sin lubida di cos dushi di Aruba, Ruzischka Tromp, docente na Colegio Sagrado Curason a cuminsa bisa.
E anochi aki, lo tin algun stoel disponibel, pero ta bay ta limita. Ta recomenda pa e bishitante bin cu nan propio stoel, e anochi aki ta bay ta formidabel.
Pa 5:30pm e evento ta ranca sali cu cantamento di e himno nacional door di tur e maestronan di Colegio Sagrado Curason y pa 5:45pm lo cuminsa cu presentacion di e banda Brisas Tropical y tambe Vicente Ras y su Sodo y Cuero.
Bin presencia e anochi aki cual ta bay ta uno formidabel unda cu e alumnonan lo haci nan maximo esfuerso pa trece un presentacion inolvidabel den conexion cu nos himno y bandera.
