Pocopoco e dianan ta yegando pa nos celebra otro dia nacional, di Himno y Bandera y manera ta tradicion, e aña aki tambe Biblioteca Nacional lo tin nan actividad rib’e dia aki.
Glenda Zavala-Maduro, Organisado di Actividad Hubenil y Cultural di Biblioteca Nacional, a cuminsa na bisa cu e aña aki tambe nan lo tin actividad riba e dia grandi aki. E dia aki lo tin nan famoso mercado di buki, unda cu e pueblo di Aruba lo por bin y cumpra buki na prijs di baca flaco. Tambe e aña aki, nan lo tin cushina crioyo manera cabrito stoba, sop’i oester, concomber y mucho mas. Ta cuminsa pa 9:00am te cu 2:30 pm.
Tambe lo tin un bunita show cultural, unda cu pa 10:30am pa 11:00am, lo tin Gucci Dancers. Di 11:00 pa 11:35am lo tin Stephany Quant, pa 11:50am te cu 12:25pm lo tin Tradicion Musical. For di 12:40pm pa 1:15pm lo tin Folklore Nos Herencia y di 1:30pm pa 2:05pm lo tin Stranger297 cu lo bin deleita e publico cu musica local.
E actividadnan aki riba 18 di maart ta un tradicion caba pa e pueblo cu tur aña ta pendiente di e actividadnan na Biblioteca Nacional. Glenda a conta cu ta hopi aña pasa cu nan a cuminsa cu e actividadnan aki. Si nan a stop cu esaki pa un tempo, pero a cuminsa bek cu ne.
Ta riba peticion di e pueblo di Aruba mes cu Biblioteca ta haci e actividad aki, ya cu e dia aki nan ta haya bukinan na prijs special. Sin lubida cu e bar y cushina bon surti, cu cumindanan crioyo pa nos saboria esaki. E pueblo ta gusta e ambiente na Biblioteca. Tambe nan lo tin un huki special pa cos dushi, un pasaboca tan gusta.
E dia aki tambe lo tin e weganan popular tradicional, manera coremento den saco, core cu webo den cuchara y mucho mas.
Na final, Glenda Zavala-Maduro ta extende un invitacion cordial pa bin celebra Aruba su Dia Nacional, Aruba su Dia Cultural hunto cu e gran famia di Biblioteca Nacional.
