Diabierna mainta Colegio EPI sector Horeca a haci entrega di un beca na dos studiante di e sector. Esaki tabata un iniciativa di La Cabana Beach Resort y Kiwanis Circle K di Colegio EPI.
E evento aki a bin riba iniciativa di Circle K y la Cabana. Colegio EPI tin hopi aña ta traha cu La Cabana Beach Resort & Casino, nan studiantenan ta core stage na La Cabana. Comunicacion entre La Cabana y Colegio EPI ta hopi bon, segun Zahaira Kelly, docente di Hospitality na Colegio EPI. El a remarca cu Colegio EPI tin studiante cu tambe ta forma parti di Circle K.
Asina tambe a bin cu iniciativa pa bin c’un beca na e studiantenan cu ta actua, cu ta ansioso pa termina nan ciclo y tambe cu ta disciplina. Esaki ta e aspectonan cu ta busca den un studiante, pa bin na remarca pa un beca.
Kelly a bisa cu e otorgamento di e becanan di diabierna, tabata e prome di hopi mas cu lo sigui den futuro. Esaki sigur ta un bon noticia pa tur di e facultad.
Tin asina hopi storia exitoso cu si cuminsa no lo tin fin. Mas cu tur riba e tereno culinario, por wak cu e interes aña pa aña ta birando mas grandi. Colegio EPI Sector Horeca tin hopi aña ta trahando cu La Cabana Beach Resort y semper nan tabata tin un bon relacion cu otro.
Palabra di gradicimento a bay pa GM di La Cabana, cu ta Joe Tessy, tambe Sudi Guda cu ta e Talent Manager pero sin kita afo, henter e facultad cu a contribui pa por a yega na e decision na cua ta e miho criteria cu por pone pa un studiante por bin na remarca y cu awe tur a bin hunto pa celebra esaki hunto cu tur e stakeholdernan.
Sudi Guda, Talent Manager na La Cabana Beach Resort & Casino a bisa cu nan tin un colaboracion hunto cu Circle K EPI.
Ta trata di un beca cu nan a otorga na dos studiante di Colegio EPI, sector Horeca. La Cabana Beach Resort kier encurasha e studiantenan pa nan drenta den e sector turistico, pa nan crece y bira lider den comunidad.
La Cabana Beach Resort & Casino ta kere hopi den yuda un lider local crece aki na Aruba.
Pa mas informacion, lesa TREMPAN di mañan.
