“Ami no ta corda e compania sin Herbert pasobra di tempo mi tabata mucha, ya e tabatey caba cu mi welo”, asina Eduardo de Veer, presidente di MetaCorp a conta na ocasion di despedida di e pensionado mayor di e compania, esta Herbert Horne. A organisa un despedida special pe na ATCO Aruba situa na Sabana Blanco, mientras cu despues su ex-coleganan a compañ’e pa su ultimo luga di sosiego.
Herbert Horne a traha henter su bida cu MetaCorp. El a wordo emplea pa e fundado, Shon Eddy de Veer y a traha te dia cu el a baha cu pensioen y tabata e ultimo empleado di Shon Eddy. MetaCorp ta e empresa di mas bieu di Aruba y ta existi mas cu 100 aña.
Horne, manera tabata yam’e cariñosamente, no ta djis un pensionado di e compania pasobra su storia ta identifica cu e cultura di MetaCorp, den cual empleadonan ta forma un carera y ta crece den e compania. Horne a cuminsa traha eynan cu 18 aña di edad y a sigui te na momento cu el a baha cu pensioen. El a traha henter su bida pa un solo compania, a keda fiel y hasta despues di baha cu pensioen, e tabata acudi na tur evento importante di “su” compania.
“Mi ta corda cu mi a caba mi scol y ora a cuminsa traha cu e compania, mi a topa Horne eynan. E ta un cabayero, un ehempel, un bon trahado cu bo por a conta riba dje tur ora. Mi a siña hopi fo’i dje, door di su ehempel”, asina Eduardo de Veer a admiti. “Nos ta contento di por a maak mee un hende manera Herbert Horne, cu a laga hopi atras”
Di otro banda, Eduardo de Veer a sigura cu no ta Horne so, sino tin un grupo grandi di trahado cu hopi aña di lealtad y servicio na e compania. MetaCorp tin un maneho di personal unico, cu ta inspira trahadonan pa crece y forma un carera largo den e compania. Bale la pena menciona cu otro aña, un otro baluarte di San Nicolas, Wendell Bennett, lo cumpli 50 aña di servicio cu MetaCorp. Un storia cu ta data for di aña 1972 caba.
Pa loke ta Herbert Horne mes, el a nace na Sint Lucia dia 29 di april 1926 y a fayece siman pasa, dia 29 di september cu no menos di 95 aña di edad. Cu e edad ey, Horne a conoce tur e directornan di MetaCorp, for di Shon Eddy de Veer, sigui pa su yiu Gerard “Shon” de Veer sigui pa su yiu Eduardo de Veer y despues tambe su yiu Eddie de Veer.
E storia di Horne cu MetaCorp a start ora cu Shon Eddy tabata di bishita na e Coney Island na San Nicolas, cu el a nota un mucha jong ta subi e cabayito y despues baha den pura ora di control, pa evita cu e mester a paga. For di leu sinta den auto Shon Eddy a sigui e hazaña di e hoben y a tuma un decision sorpresivo. El a baha fo’i su auto, cana bay na e cabayitonan y a duna Horne trabou mesora. El a hacie esun responsabel pa e cabayitonan pa garantisa cu ningun hende ta subi pornada. E storia ey a bay te na 2001, ora el a baha cu pensioen cu no menos di 48 aña di trabou fiel na MetaCorp.
Durante su casi 50 añanan di empleo, Horne a traha den diferente compania afilia na MetaCorp pero e mayoria tabata cu ATCO. Un tempo el a traha den e negoshi di cine tambe, pasobra di berdad e tabata un “all around man” pasobra e semper tabata cla pa yuda unda cu tabatin mester di dje. Hasta despues cu el a baha cu pensioen, e semper tabata yama pa comparti un idea, sugeri un otro forma pa brinda miho servicio y hasta critica den caso cu algo no ta bon.
Pa MetaCorp por a alcansa 100 aña continuo di existencia, desde 1920 pa 2020, tabata necesario pa por a conta cu empleadonan fiel manera Herbert Horne, cu a dedica nan alma na progreso di nan mes, di nan compania y di Aruba.
