Un homber sin respet y bou influencia a haya holpi y keda nanishi ta sangra. Tur cos a pasa diasabra atardi. Polis a bay pura na Casa Vieja na Cumana. A drenta informacion cu tin un pelea andando. Dos unidad di Playa a yega mesora. Na yegada a tende cu ta un homber bebi tabata causando problema.
E tabata insulta tur hende. E tabata coba mama y papia otro palabranan hopi mahos. Tur esey mientras otro famianan ta sinta ta come cu nan yiunan chikito. Ora un a bay reclama e homber, el a reacciona cu un mokete den direccion di e persona cu a reclame.
E persona a djis pidie pa porfabor respeta y wak con e ta papia. Su contesta tabata cu un mokete dirigi. Logicamente e persona tambe a reacciona bek cu sla. El a tene e homber cu un yabi y mande tera. A bati alarma mesora y polis a yega.
Nan a deten’e. A pidi transporte policial pa hib’e warda. Su nanishi tabata sangra. Esey ta indica cu el a haya sla. Polis a hiba su auto warda. E trahado a bin cu su cuenta cu tabata tin habri. A pidie paga y el a swipe cu yudansa di polis. Testigonan ta bisa cu e homber berdad tabata papia duro ofendiendo tur hende den e restaurant.
