Seleccion nacional femenino di futbol di Aruba tin un seleccionado (bondscoach) nobo y esey ta Arjan van der Laan. Hunto cu su staff nan ta den pleno preparacion pa forma un seleccion nobo cu e hungadonan di Aruba como esunnan na Hulanda.
Arjan van der Laan, bondscoach Hulandes ta dunando training na AVB (Arubaanse Voetbal Bond), a splica cu e siman aki lo tin training pisa pa mira kico tur mester ahusta y prepara pa e torneo cu ta bini na Corsou. E meta tras di e training ta pa ser conoci cu staff y personal cu tin na AVB y tambe mira kico tur ta importante pa analisa na Aruba.
Lo mas importante ta pa e siguiente cuater dia train duro cu e hungadonan di Aruba. Finalmente lo tin cu haci un seleccion pa Corsou y na Hulanda tin un grupo di hungado activo tambe, cual e siman venidero van der Laan tambe lo bay mira y combersa cu nan.
Joally Lake, coach assistent di seleccion grandi di Aruba, ta conta nos cu den e dianan aki tin un camping pa scout hungado cu lo hunga den weganan venidero, hungadonan cu ta na Aruba y ta varia di edad. Ta papiando for di e muchanan di 12 te cu 24 aña mas o menos.
Akiden lo tin bintidos mucha muhe Rubiano y tin diferente mucha muhe di diferente team di Aruba. E siguiente stapnan ta pa nan bay hunto cu e hungadonan di Hulanda y cera ful un seleccion pa Aruba. “Esaki ta prome biaha cu ta sosode pa Aruba. Antes nos tabata tin basta hungado di Aruba mes, nos tabata tin un par di Hulanda y awor nos tin mas.
Hunto cu un bondscoach di Hulanda tambe cual ta prome biaha ta pasa na Aruba. E ta algo grandi pasobra el a coach team di mucha muhe grandi caba na Hulanda, kiermen e tin hopi conocemento cu por siña di dje pa nos por sigui bay dilanti”, Lake a expresa.
