E di dos edicion di e USA Baseball Coaching Clinic a tuma luga den e weekend di 14 y 15 di october. Durante e dos dianan aki a ofrece na e comunidad di coaches na Aruba e oportunidad pa amplia nan conocemento.
Mirando cu e tres coachanan cu a duna e tayer, esta Steve Butler, Drew Briese y Andrew Bartman ta coachnan cu tin varios decada den e deporte y cu actualmente ta maneha of coach na nivel nacional pa USA Baseball. Por cierto coach Drew Briese a maneha y coach Steve Butler a coach e team nacional cu a gana campeonatonan di WBSC na nivel mundial.
Drew Briese ta head baseball coach na Centre College y Steve Butler ta e head baseball coach na Eagan High School. Andrew Bartman ta e director di coaching development pa USA Baseball. Sigur un power trio.
Ariba diasabra na Universidad di Aruba a tuma luga e parti teoretico y a inicia cu e sesion pa studiante-atletanan unda cu Andrew Bartman y Drew Briese a elabora riba diferente aspecto di e trayectorio di un student-athlete y con un coach ta influencia esaki.
Durante e sesion di mainta cada un cu nan area y nivel di experticio a profundisa nan mes riba e topiconan di “Infield, Catching, Hitting, Base Running, Pitching, Practice Planning y What Coaches Mean.” Esnan presente a disfruta di un mainta di interaccion cu e coachnan aki, lansando pregunta y discusion nan cu lo yuda nos coachnan di Aruba den nan tarea.
Interesante tawata cu cada un di e coachnan di USA Baseball tawatin nan mesun trayectorio y cu a sigui cu e deporte como nan guia den bida. Y esaki tawata visibel tambe na e manera cu nan a presenta e materia y nan storianan individual. Sigur a comparti informacion y conocemento cu lo perdura.
Diadomingo na veld di Pos Chiquito a sigui cu e parti practico di e clinica, asina demostrando cu algun hungado boluntario diferente cos cu a papia riba dje e dia prome.
Coachnan local a expresa di a disfruta di e clinic y cu esaki a of “reforsa locual cu nan tawata haci caba, a duna nan un otro perspectiva riba otro areanan of a siña algo completamente nobo”. A adapta e clinica den 2023 basa riba e coachnan cu tawata presente, por ehempel mayoria tawata di e categorianan 12U.
Na final di e sesion a otorga na cada participante un certificado di participacion y a ricibi un tshirt of cap di parti USA Baseball como recuerdo.
Ta kere cu esaki lo ta e caminda cu mester sigui pa nos baseball por sigui desaroya na Aruba. E meta ta pa ofrece e oportunidad pa coachnan cu tin’e amor y dedicacion pa e deporte amplia nan conocemento. Y si logra combina e pasion y boluntad cu e sed pa conocemento y mehoracion sigur lo mira un desaroyo positivo pa baseball na Aruba.
E siguiente paso lo ta e certificacion di USA Baseball nivel A, B y C. Nivel A & B cu lo por haci online y e nivel C lo tuma luga aki mes na Aruba den 2024. Lo tin mas informacion riba e topico aki.
Alabes kier a gradici e instancianan y personanan cu a yuda haci e clinic aki posibel.
