E dos ruman muhenan alegre y popular a haya nan mes envolvi den un accidente di auto na Moko awe diadomingo pa mas of menos 3:30 pm. Ta trata aki di e conocido Clarita Britten cu tabata chauffeur y pa un descuido a subi caminda sin paga tino cu otro auto tabata bin. E otro auto a bin dal den nan, esta Clarita y su ruman muhe Wika, cu tabata sinta den banda.
E impacto tabata fuerte y a percura pa bastante daño material. Den e accidente Wika, cu tabata pasahero, a resulta herida y den e otro auto tambe tabatin un herido. Polis di trafico a bin na e sitio pa asina haci un investigacion riba e desgracia.
Claritta Britten di 81 aña di edad a bira masha popular na Aruba, despues cu el a experencia un atraco arma den su cas na Tanki Leendert 237-B, riba dia 6 di februari 2018 pa mas of menos 7:30 pm. E tabata hunto cu su ruman muhe Wika ora cu un homber a drenta su cas, cay na rudia su dilanti, pone un pistool na su frenta y a pidie pa su oronan.
E forma con Clarita a comparti su testimonio a hala hopi atencion y a percura pa bira un di e videonan miho mira di 24ora.com pa aña 2018, cu no menos di 240 mil usuario cu a mir’e, 6491 comentario riba e video, 2960 usuario a comparti (share) e video y sin lubida 10.092 likes, cu a hacie un di e videonan mas mira di e aña ey.
