Cu su cara di palo Cheslon Cortez (30) a bisa Hues cu e 27 mil florin confisca di dje ta placa cu el a spaar ora cu e tabata traha. Esaki mientras cu e mes a bisa Hues cu debi na pandemia el a perde trabou y a cuminsa bende droga. Corte a hay’e culpabel y e placa ta keda pa caha di Gobierno.
Tratamento di su caso a tuma luga diabierna mainta. E acusacion contra dje ta cu di februari 2016 te cu februari 2022 el a bende cocaina. Y e di dos acusacion ta cu na februari 2022, e tabatin cocaina, marihuana, posesion di bala cayente y huls.
Dia 2 di februari tabata e prome dia di trabou atrobe pa Cheslon Cortez na aeropuerto, despues cu el a perde su trabou den hotel a causa di pandemia. Y esaki tabata su ultimo dia tambe. Den pura pa no yega trabou laat, e no a saca tur cos for di su rugtas y na momento cu a pasa esaki den mashin a descubri tanto e droga, como e bala cayente y huls.
A haya 72 huls (cu posesion di esaki pa ley no ta castigabel), y diferente sakito cu piedra y marihuana. E droga tabata hinca den diferente potchi y tambe a haya un suma di placa.
Segun el a splica Hues, tur e cosnan ey ta pertenece na dje. “Pero pakico bo ta bay trabou cu droga?”, Hues a puntr’e. Su contesta tabata cu esaki tabata su prome dia y door cu e tabata laat, e no a drecha su tas y a laga e cosnan ey den dje. El a haya trabou pa hinca maleta den avion.
