Tin un investigacion pisa andando relaciona cu morto di e turista Mericano, Neftaly Torres di 42 aña di edad, na costa panort di Aruba. E caso a sosode siman pasa diahuebs na “Moro”. E tabata riba un tour. Pero tur cos ta mustra cu e caso por bolter awo y e guia turistico por hay’e den basta problema cu husticia pasobra e famia tin grabacion con a puntra si por bula na awa y e guia a bisa cu si. E casa ta sinti cu e tour operator a conseha nan robes y cu awor nan ser keri a fayece, parcialmente door di su culpa!
E homber tabata cu su pareha tambe den e tour. Nan a bishita Conchi y djey sigui bay pabou direccion Daimari. Pero prome cu esey a pasa na Moro cu ta poco pabou di Conchi. E turistanan a baña na Conchi. Ora a yega mas pabou na Moro e homber a bay bula for di baranca pa drenta awa. E tour operator lo a bis’e cu e no ta peligroso. Esey a duna e turista un grado di confiansa.
E tabata un eror pasobra ora cu el a bay awa e no por a bin tera. E tour operator a purba yuda pero e no por a haci masha. E turista a bay den panico y a guli awa y hunto cu e cansancio, finalmente a hoga. Ta considera cu e tour operator aki ta carece di experiencia.
Parce cu e practica aki ta sosode mas biaha. Hopi di e turistanan no ta haya un guia corecto. E propio tour operator, ora nan mira un situacion asina, mester avisa e turista pa e keda trankil. Ta door cu nan ta pusha pa purba yega tera y bay den panico, ta causa cu nan ta cansa y hoga. Si e guia di tour a djis bisa nan keda trankil y mantene bo mes riba awa y bay afo, ta bati alarma y wardacosta of helicopter ta bin pa rescat’e mesora. Ta ora cu e turista no por mas y a hoga, e ora ey ta core bati alarma. Pa ora cu Parkrangernan y autoridad yega ta mas bien pa saca e curpa sin bida for di lama.
E ultimo caso aki, e guia turistico a duna declaracion na polis. Tambe casa di e victima a declara tur cos. El a hasta conta cu e operador di tour a bisa cu e por bula y cu no tin problema. E señora a graba ful e proceso con su casa a bay awa y hoga. Un golpi duro pa e famia. E señora a bay bek den parke cu algun hende mas pa mustra nan unda su casa a hoga.
Mientrastanto autoridad ta evaluando si lo detene e operador cu por hay’e cu un sospecho di “Dood door Schuld”. E ta wordo mira como parcialmente culpabel di morto di e turista. E sa cu eynan ta un area peligroso pero tog a conseha pa e turista bula. Hasta na Conchi e Parkrangernan ta bisa bo cu bo por landa pero riba bo mesun risico. Hopi turista ta puntra y ta bisa nan mesora. Ora cu lama ta mucho bruto ta evita cu turista ta drenta awa. Algo cu tambe mester bira parti di e exigencianan, ta pa cada tour tin un salbabida cu cabuya mescos cu ta wordo exigi den un boto.
Si bo ta core tour na costa y turista ta drenta lama, abo como operador mester ta prepara tambe pa si un situacion presenta. No mester laga mucha jong haci tour cu turista. Nan no tin experiencia si un emergencia presenta. Awor den e caso specifico aki e mester bira un eye opener pa otro tour operatornan tambe.
E siman aki lo keda pendiente pa mira si finalmente lo detene e tour operator cu a conseha cu no ta peligroso y cu e turista a drenta lama y hoga.
