Diahuebs mainta, alrededor di 9’or y mey a tuma luga un accidente grave di auto. Unidadnan di polis, ambulance y tambe bombero a keda dirigi cu urgencia pa e rotonde di Hato caminda tin un persona pega den un di e vehiculonan envolvi. Tabata trata di impacto entre dos mini van, un marca Suzuki y e otro marca Daewoo cu a sosode na e parti di e rotonde net dilanti di sucursal di Elmar na Hato.
Pa motibo desconoci, e van Daewoo a subi e parti mey mey cu ta separa e vak cu ta bay abou direccion Pos Abou, cu esun cu ta bin ariba direccion Tanki Flip y dal den e van Suzuki cu tabata bin den direccion contrario. E manera con e accident a sosode, a pone cu e golpi tabata directo riba ambos chauffeur. E chauffeur di e Daewoo ta un hende muhe, kende tabata keha di dolor di pecho,nek y pia.
Bombero a bin cu e makinaria special cu nan tin na nan disposicion pa kibra e body di e auto, specificamente e porta di chauffeur y asina, hunto cu paramediconan, a logra saca e persona herida pa bay cune hospital. Mientras cu tur esaki tabata sosode, agentenan policial a percura pa cera e caminda pa trafico y cuminsa tuma dato di partidonan y testigo.
