E ta un caso largo. El a sosode dia 27 di december 2025. Un chauffeur, Oscar Duran Peña, basta burachi a subi auto pasa caminda di Caya Musica, dal dos hende y sigui core. Awe casi un aña despues hues a hay’e culpabel. Pero en bes di 3 aña, manera fiscal a pidi, hues a condene na 4 aña di prizon.
Tratamento di e caso a sosode na juni ultimo te cu fiscal a haci su exigencia, pero na momento cu hues mester a dicta sentencia, el a habri e caso bek pa scucha e yiu muhe como testigo y un otro chauffeur cu tabata papia cu ta un auto preto a dale.
Finalmente diabierna mainta a yega na final di e caso, den Prome Instancia, unda hues a cuminsa pa bisa cu el a haya Duran Peña culpabel di tur e acusacionnan, cuminsando cu esun mas pisa cu ta “dood door schuld”. Si a bisa cu no a hay’e culpabel di “roekeloosheid”. E terminologia aki ta referi p.e. ora cu e chauffeur ta core pa polis den un forma “roekeloos”.
“Bo a bebe hopi y asina mes bo a subi auto y sinta tras di stuur,” el a cuminsa pa bisa e acusado. Banda di esaki, den un auto cu e luz banda robes no ta cende y e glasnan ta getint demasiado scur. Tambe a core den e estado ey den un area cu poco iluminacion unda cu e yerbanan a crece te subi riba caminda. “Bo tabata sa esey y no a tene cuenta cu e peatonan mester subi caminda pa no cay den e mondi,” e hues a splica.
E pregunta cu mester haya contesta tabata: con grandi bo culpabilidad ta den esaki y di ki forma. A cuminsa pa elimina e acusacion cu ta papia di “roekeloosheid”, pero si por bisa cu el a maneha di un forma “onvoorzichting”.
A tene cuenta cu loke a mira riba e videonan di e casnan riba e ruta unda e accidente a sosode. Y a tum’e na malo cu despues di a alcansa Lisa Marie Barnett, naci 26 october 1968 (57aña) na Merca, y su yiu muhe, el a sigui core. Barnett a fayece dia 13 di januari y a bin detene e chauffeur un luna despues di e accidente.
Despues di analisa tur circunstancia, hues a yega na un decision diferente cu e peticion di fiscal. En bes di tres aña, el a dun’e 4 aña y cinco aña ta kita su rijbewijs.
