Diadomingo anochi pa 8:45 pm a sosode un accidente den e Drive Thru di Wendy’s na Cura Cabay. Ta trata aki un auto marca Nissan modelo March color licht blauw, cu a bay dal tras di un otro auto marca Honda modelo Accord color shinishi.
Te eynan no tabatin problema, pero ora cu e compania Forensys a yega pa atende e accidente, a constata cu chauffeur di e Nissan March cu a ocasiona e accidente no tin rijbewijs.
Pa colmo e ta un menor di edad tambe. Polis a presenta na e sitio y a deten’e mesora, debi cu stuur auto sin un rijbewijs ta considera un crimen den nos sistema legal.
Polis a bisa e chabalito aki su derechonan y a deten’e, hinc’e den transporte di polis y a hib’e ward’i polis na San Nicolas pa present’e dilant un sub fiscal cu lo mester dicidi riba su posibel persecucion. Normalmente ta tuma dato di e chauffeur, ta dun’e un multa y e por bay cas despues. Lamentablemente e hoben aki a keda sin su Wendy’s y sin auto tambe.
