Debi na comportacion iresponsabel den trafico insigur riba nos isla, a produci un otro victima awe mainta.
E chauffeur envolvi den e accidente di dia 3 di augustus ultimo, tabata stuur pero na mesun momento tabata mandando whatsapp, pues tabatin atencion limita na trafico. Dado momento el a medio baha caminda y alcansa un peaton,
Emiliana de Leon, cariñosamente yama Ana, naci na Republica Dominicana, di 76 aña di edad.
Un conoci di e victima a conta cu debi na e accidente, cu el a kibra brasa drechi, pia fractura tur caminda. El a sobrevivi tres siman. Pero lamentablemente despues di hopi complicacion, a fayece awe.
Ana a bin busca un biba na Aruba na 1993, pues 25 aña pasa. E ta manera un mama pa hopi hende. Na momento di e accidente, e tabata rumbo pa su trabou na Alto Vista.
Famia ta lamenta cu e chauffeur envolvi nunca a yega hospital den tres siman di tempo pa puntra pa e victima. Ni un dia el a bay. Amistadnan tabata pendiente pa mira si e chauffeur lo a bin duna cuenta.
Famia a bay Polis pero ainda no por logra haya rapport di e accidente. A papia hasta cu seguro. Nan a haci tur posibel pa e señora aki. Amistadnan a drumi na hospital pa sostene. Dos dia pasa a sak’e for di Intensive Care. Despues a hink’e den Medium Care. Diasabra atardi a bolbe hink’e den Intensive Care, mirando cu el a haya complicacion. Amistadnan di Ana tin palabra di elogio so na personal di Hospital, pa e atencion cu a brinda e pashent.
E yiu muhe di Ana De Leon ta menciona cu su mama ta un gran hende muhe. E yiu kier pa e chauffeur paga pa su acto. E yiu muhe tin algun dia caba na Aruba. E tabatin por lo menos 15 aña sin mira su mama, aunke cu nan tabatin contacto via telefon te hasta un dia prome cu e accidente.
E ta conta cu su mama tabata sostene e famia. Debi na tur golpinan cu el a ricibi, Ana no por a responde manera debe ser cu su yiu. Awo e famianan lo bay prepara pa hiba e curpa bek pa Republica Dominicana, pa asina hibe na su ultimo luga di descanso.
E yiu muhe di Ana tin un mensahe pa e comunidad. Pa purba di uza celular pa cosnan importante y no pa chat. Pasobra wak e bida cu a bay pa motibo di chat. Un bida bon, cu deseo di biba.
Na famia di Emiliana de Leon, nos di 24ora.com ta extende nos mas profundo palabranan di condolencia.
