Lidernan cu ta traha den un Centro di Cuido y Guia di Mucha (Creche y traimerdia) ta pasa hopi tempo cu e muchanan den nan grupo. Mirando e hecho aki, por conclui cu e lidernan tin un tarea sumamente importante y responsabilidad grandi ora ta trata cuido, guia y seguridad di nos muchanan.
Tur mucha, especialmente muchanan chikito ta depende riba adultonan pa ta nan voz y pa yuda nan ora nan ta den peliger, esaki ta haci cu e lidernan tin un rol importante ora ta trata señala posibel/sospecho di abuso/negligencia di mucha. Pa e motibo aki Fundacion Pa Nos Muchanan (FPNM) hunto cu Fundacion Respetami ta organisa e charla “Reconoce Señalnan di Abuso di Mucha” pa asina eleva nan conocemento riba e topico aki.
E charla aki lo tuma lugar riba, diasabra, 31 di augustus 2019 di 9:00am pa 1:00pm. Durante e charla e lidernan lo siña tocante, entre otro, e diferente formanan di abuso y negligencia di mucha; con pa reconoce e diferente formanan; e señalnan cu ta indica cu abuso/negligencia por ta tumando lugar; con e por haci un diferencia ariba e prevencion di abuso y negligencia di mucha; consecuencia pa e victima; con pa raporta esaki y hopi mas.
Pa mas informacion y pa inscribi yama FPNM na 588-0856/ 583-4247 of pasa libremente na nos oficina situa na Cumana #2.
