Pa di 6 biaha Centro di Bario Noord a haci entrega di Premio Meneer Ovito Tromp. Na 2016 directiva di CBN a dicidi pa introduci un premio pa duna reconocimento na baluartenan di e districto di Noord cu pa varios aña na un manera of otro a of ainda ta aporta grandemente na nos dushi districto. No solamente nos ta reconoce e echo cu ta importante pa duna balor na nan trabou awo cu nan ta na bida, pero tambe nos ta di opinion cu un premio asina por forma incentiva pa e generacion nobo por haya e smaak pa tambe aporta na nan bario.
Na 2016 Chua Faro a ricibi e Premio Meneer Ovito Tromp, na 2017 Julian Eli Pers (awe d.f.m.) y Isnardo Faro, na 2018 Rosalinda ‘Tanta Lily’ Luydens, na 2019 Guillermina ‘Mina’ Tromp y na 2023 Margarita Roza-Christiaans. E Personanan cu pa hopi aña a y te ainda ta aporta grandemente na nan dushi Districto di Noord. E aña aki a otorga e premio na Edna Zievinger.
Edna a nace y crece den Noord, den su bario stima Sabana Liber. Tety of Tanty ta nombernan di cariño cu su subrinonan a dun’e. Edna ta un persona hopi disciplina, corecto y si e pone un meta, e ta traha pa logr’e.
Prome cu Edna a baha cu pensioen, ya e tabata gusta deporte. Edna a practica entre otro basketball, korfbal, Tae Bo, Hiit fit y gym. Diesdos aña pasa Edna a cuminsa cana. Djey e canamento a bira cana y core, p’esey el a dicidi di join un team. Pa basta aña Edna a forma parti di e team di Malmok Runners y 2 Fast 4 U. Actualmente Edna ta forma parti di e team Vipers Strong. Edna ta un dama hopi activo, cu hopi energia y ta motiva hopi persona rond di dje. Keto bay e ta inspira e chikito-, hoben- y adultonan pa nan tambe core. Sigur esunnan di su famia.
Edna su hobby coremento a bira su pasion. Edna su rutina di dialuna pa diahuebs ta di lanta 3:45 am pa start y riba diasabra pa su “long run” nan. Edna a yega di subi podium hopi biaha pa tuma su premio of medaya den su categoria di 60+. Hasta ora Edna bay cu vakantie e ta busca online si por tin un evento cu e por participa na dje.
Edna a participa den diferente careda of marathon manera: Ronde van Aruba, Betico Run y Boulevard Loop. E parti aki tabata pa nos conoce Edna un tiki mas y mustra con activo e tabata y ta ainda, no obstante su edad.
Pa loke ta trata su trabounan boluntario. Di 2017 te cu 2019 Edna como miembro di e grupo 60+ Liber Liber di Pro Juventud Savannah a yuda specificamente cu laga e Adultonan Mayor move e curpa y asina keda den movecion y activo.
Desde 2019 Edna ta boluntario na Pro Juventud Savannah como secretaria di directiva. Edna ta un secretaria dinamico y responsabel. Den 1 pa 2 dia e ta manda e notulanan di reunion. Edna ta bisa:”Traha e notulanan mesora, ta spaar bo trabou y tempo, pasobra ainda bo ta corda ful e reunion.”
Despues di Covid, directiva di Pro Juventud Savannah a lanta e grupo Café Feliz Savannah. Edna ta forma parti tambe di e comision di Café Feliz Savannah cu ta percura pa brinda actividad pa 55+. Den e comision aki, Edna ta encarga cu e parti di secretaria, pero tambe cu e parti financiero, contacto cu Cede Aruba y duna gym durante e encuentronan. Hunto cu e otro miembronan di comision, Edna ta prepara e mainta y ta ehecuta e programa. Café Feliz Savannah tin 50 pa 60 miembro.
Otro grupo caminda cu Edna ta boluntario y miembro: ta Grupo Uni di Noord. Pa dos periodo Edna tabata coordinador di Grupo Uni. Den Grupo Uni di Noord, Edna ta yuda y sostene tur miembro den cualkier tarea cu nan pidie. E ta un persona cu semper ta bin cu e ideanan nobo na bienestar di Grupo. Edna a forma parti di diferente comision di actividad extra di Grupo Uni. El a forma parti den e preparacion pa e celebracion di 45 aniversario di Grupo aña pasa na maart. Semper Edna ta yega contento, y yen di alegria pa pasa un mainta dushi y positivo.
Banda di tur e responsabilidadnan menciona Edna ta chauffeur pa hopi cu ta bay actividad di Pro Juventud Savannah y Grupo Uni di Noord. Esaki e ta hacie cu hopi amor mirando cu sin e servicio aki e personanan cu e ta busca no lo por bin. Edna ta un tremendo persona pa tin como miembro di un grupo, como un boluntario di un directiva of un comision, pasobra ora cu Edna palabra algo cu bo, e ta cumpli.
Edna ta un persona cu ta haci su tareanan serio, responsabel y cu hopi dedicacion. E ta un persona consciente, puntual, motiva y semper cla pa yuda.
Pa tur e tremendo trabounan como boluntario, dialuna, riba Dia di Himno y Bandera, directiva di CBN a otorga Edna e Premio Meneer Ovito Tromp 2024. Edna, masha masha danki pa bo trabou boluntario na desaroyo di Noord y su hendenan. Cu Papa Dios bendiciona Edna cu hopi aña mas di bida y salud pa por sigui hopi aña mas cu nos gruponan di Noord como boluntario. Pabien na bo persona y henter famia cu a compaña Edna.
