Partido RAIZ no tin un posicion fiho ainda riba e echo cu Parlamento di Aruba lo no cumpli cu nan “deadline” pa yama e reunion pa vota riba e ley pa permiti parehanan di mesun sexo casa na Aruba. Ta parce cu ainda tin negosacion andando pa mira con por scapa cara y evita mas sla politico riba e tema delicado aki, cu no ta conta cu sosten di tur hende den comunidad. Ta sinti cu den seno di e partidonan tradicional, esta MEP y AVP, no tin sosten mayoritario pa adapta e leynan civil di nos pais. RAIZ a sali bisa cu nan si ta na fabor di e cambio di ley, pero awo no ta hayando sosten di nan partner den coalicion. RAIZ a uni cu otro fraccionnan den Parlamento di Aruba y a pone MEP bou presion. MEP a contesta mesora cu nan no ta ria pa presion, pa cual RAIZ awo ta den reunionnan intenso, internamente, pa fiha un posicion cla.
No ta un secreto cu tin un tension den gobierno. E partidonan cu ta forma coalicion, RAIZ y MEP ta gobernando manera un pareha divorcia pero toch bibando hunto den cas. Aunke ainda tin un gobierno, cada ken ta goberna pa nan cuenta. Por ehempel, riba e topico di matrimonio di mesun sexo. For di inicio RAIZ a laga sa cu e ta PRO matrimonio di mesun sexo. Pero no a dura mucho cu a laga su votadonan y su principio na caya pa sostene MEP pa hunto nan (MEP-RAIZ) bay den casasion contra matrimonio di e mesun sexo.
RAIZ for di aña pasa e inicia cu un iniciativa di ley riba matrimonio di mesun sexo. E dos parlamentarionan di RAIZ, cu ta casa cu gobierno, a cera cabes hunto cu Miguel Mansur di Accion 21 pa firma e iniciativa di ley. Na october 2023 a entreg’e na Presidente di Parlamento y e tabata “OV Klaar”, pues, cla pa trat’e den un reunion publico.
Pero, lo contrario a sosode. MEP a keda bira RAIZ y no a yama e reunion. Tin un miembro di parlamento cu tin tur cos tranca, Darlaine Guedez-Erasmus. E ta presidente di e comision cu ta atendiendo e ley aki. Prome cu vota p’e, lo mester reuni cu varios organisacion, entre otro clero, pa por scucha nan opinion y pensamento riba e proposicion di ley. Pero, ta parce cu na un forma sistematico, ta purba “gana tempo” y rek e tempo mas posibel. Kier pa Corte di Casacion na Hulanda tuma un decision cu aki na Aruba e politiconan no ta capas di tuma, pa miedo di perde voto. Raiz sinembargo ta poniendo MEP bou presion door di forsa pa yama e reunion y pa Parlamento di Aruba tuma un decision prome cu e sentencia di Corte di Casacion. Awor, Darlaine Guedez-Erasmus, un politico cu no mucho hende conoce, a pidi Presidente di Parlamento pa “wanta un rato”. Sinembargo, mr. Edgard Vrolijk a priminti RAIZ cu pa fin di januari of cuminsamento di februari e lo a yama e reunion. Pero, te awe nada ainda!
RAIZ su buchi a yena y riba dia 19 di februari ultimo a manda un carta pa mr. Edgard Vrolijk, Presidente di Parlamento, indicando cu a cansa di warda y a dun’e 30 dia p’e yama e reunion. A mara Vrolijk na un deadline. Djey, durante un conferencia di prensa di MEP, Vrolijk a contesta RAIZ y a bisa nan bon cla cu: lo yama reunion ora tin espacio p’e y no riba “kier” di ningun parlamentario.
Ta falta algun ora pa e trinta dia culmina y yega ora 0 pa mira e proximo paso di RAIZ riba e topico aki. Pues si lo sigui guli manda abou of ki movecion lo haci. Diamars atardi, ekipo di 24ora.com a topa cu mr. Geoffrey Wever, Minister di Asuntonan Economico na su salida pa Hulanda na Aeropuerto Internacional Reina Beatrix. A puntra Wever riba e desaroyo aki caminda MEP ta blo bira RAIZ. Wever a indica cu, el a sigui e desaroyo y cu tin un reunion tumando luga diamars atardi ainda pa mira kico ta bay sosode. Reunion cu ken? MEP y RAIZ? RAIZ den su seno so? No ta mucho cla ken ta na mesa. Ta mustra aki mas bien un reunion entre Misha Raymond cu demas parlamentario, mirando cu atardi laat a nota salida di Minister Ursell Arends for di Cocolishi, pues no ta mustra manera Arends a forma parti di e reunion. Mas bien un reunion riba nivel parlamentario.
Ta pendiente e resultado di e reunion, pa mira si RAIZ ta para duro riba su deadline cu a duna Presidente di Parlamento, mr. Edgard Vrolijk (MEP). Mester menciona cu criticonan ta opina cu Raiz a sali duro, na otro ocasion tambe, pero despues ta laga nan posicion cay, pa por sigui den gobernacion. E bala awo ta den nan cura, pasobra di berdad e tema di matrimonion di mesun sexo ta dividi comunidad, pero awo obviamente, ta dividi coalicion tambe!
