Contrario na e tradicion di tur eleccion, e biaha aki lo mester tin un poco mas pasenshi pa haya e votonan individual di cada politico. Antes ta den fin di siman mes nan ta sali. Pero a opta pa laga e trahadonan descansa y cuminsa hinca e resultado dialuna mainta den computer pa keda cla atardi.
Tin di e empleadonan di Censo cu a traha 25 ora sigui tras di otro pa por a organisa eleccion e aña aki. E pueblo votado hopi biaha no tin un idea di henter e operacion cu tin tras di organisacion di un eleccion asina. E no ta djis pa conta e votonan un pa un, sino henter e trabou prome cu hasta yega eynan.
Aunke cu un dia no lo haci diferencia den e resultado, e ta cambia e percepcion y e color di bos di e politiconan den e prome negosacionnan cu ya a inicia. Tin algun scenario cu mester evalua y preguntanan cu ainda no tin contesta den varios partido politico.
Imagina cu den partido RAIZ, cu si abogado Geoffrey Wever a haya mas voto cu Ursell Arends. E lo cambia henter e tono interno den partido, e lo cambia plannan di ken ta bay Parlamento of ken lo drenta Conseho di Minister. Den otro casonan antes, e lider lo tene honor na su mes y tuma retiro tambe.
Den seno di e partidonan Accion 21 y MAS no ta premira e problema ey. Ta mustra cu ey e lidernan mes a bay cu mayoria voto, aunke nunca por descarta nada.
Den seno di partido MEP tin otro retonan. Ey bo tin e pregunta cu si Dangui Oduber a haya mas voto cu Evelyn Wever, cu riba su mes por bira un presion pa cu liderazgo di e partido y riba e funcion di Minister Presidente den caso cu forma un coalicion. Lo mester warda ey pa mira si e candidatonan nobo a haya mas voto cu esunnan cu mas experiencia den MEP cu no kier a move of baha pa e hobennan por subi. E hecho cu Chris Romero no a sigui mas den MEP, of miho dicho, a lag’e afo, cu si esey a causa cu e votonan a bay pa otro partido y cu por ta e mas di mil voto cu MEP a perde.
Y finalmente den AVP tambe tin e mesun reto, esta si Mike Eman a bay dilanti of atras den voto. Mester midi cu si e decision pa wanta Benny Sevinger riba lista a yuda AVP den voto of si el a costa e partido. Tin e pregunta cu si e generacion mas bieu a mantene of crece den voto of si nan a cay. Mescos pa e generacion nobo, cu si nan a bin yuda e partido of si acaso no a logra e votonan anticipa. Eyden tin e factor Richard Arends cu no a sigui mas riba lista, cu lo mester analisa si e votonan ey a keda pa partido of si nan a bay pa partidonan nobo. E hecho cu den Noord y Santa Cruz no tabatin candidatonan fuerte, si esey a causa cu no a logra mantene e votonan di cuater aña pasa.
Bisando tur esaki, varios partido ta wardando anciosamente riba e votonan individual pa fiha posicion, pa tuma retiro eventualmente of pa dicidi cu si ta bale la pena forma cu otro partido of pa probecha reforma partido den oposicion. Aunke cu un dia lo no cambia nada, toch ta sinti cu den e partidonan cada ora ta parce un dia completo. Specialmente pasobra dialuna Gobernador ta cuminsa scucha partidonan pa mira ken ta nombra Informador y despues Formador di Gobierno.
E scenarionan di formacion ta:
• AVP-MEP (16 asiento)
• MEP-RAIZ (11 asiento)
• MEP-RAIZ-A21 (12 asiento)
• MEP-RAIZ-MAS-A21 (14 asiento)
• AVP-RAIZ-MAS (11 asiento)
• AVP-RAIZ-MAS-A21 (12 asiento)
Ta anticipa cu Gobernador, bou di e circunstancianan cu Aruba ta aden actualmente, cu lo purba forma un coalicion di e base mas amplio posibel. MEP a anuncia cu e ta habri pa traha cu tur, menoa cu AVP pasobra nan ta e universidad di corupcion di Aruba y nan tin sospechoso riba nan lista. AVP a bisa di ta habri pa traha cu tur. E realidad sinembargo cu MEP a caba di sostene POR pa saca Marisol Lopez na mal ordo for di Conseho di Minister. Ta pa prome biaha den historia cu a pasa un mocion di desconfiansa contra un Minister den funcion y kit’e fo’i trabou. E herida ey ta hopi fresco ainda. Pero no tin logica den politica, como tal tur opcion na final ta habri.
