Awe diasabra 28 di maart, ta exactamente 13 aña pasa cu a lansa e prome website di noticia na Aruba, 24ora.com. Miss Aruba Carolina Raven a primi e boton pa manda e website den aire, na Cas di Cultura. Awe e website di e tempo ey a comberti den e organisacion di noticia mas grandi riba nos isla, cu e ekipo mas grandi di redactor, reporteronan y IT’er, mientras cu e ta e media cu mas siguido tambe!
“Tabata un soño den mi camber di studiante na Hulanda, sintiendo falta pa haya noticianan di Aruba. Mi a cuminsa traha pocopoco riba e idea te cu el a cristalisa y a desemboca den un website cu awendia a crece y bira esun mas grandi na Aruba”, asina Mark Benson Denz, director di Headlines Group, cas editorial di 24ora.com, a duna di conoce awe.
Aña pasa 24ora.com a conta cu 1.607.125 usuario, un crecemento di 13.61% compara cu aña 2018. Ta interesante pa menciona cu e “pageviews” tambe a crece enormemente te na 43.738.239 durante henter aña. E tempo cu cada usuario ta keda riba e website tambe ta aumentando gradualmente.
E aña aki nos a habri cu un crecemento enorme, cu 613.643 usuario entre 1 di januari pa 28 di maart 2020, cu ta no menos di 178.200 usuario mas compara cu aña pasa, pues un crecemento di 41%.
Mark Benson Denz a funda e prome website di noticia na Aruba, 24ora.com (Prome den Noticia) dia 28 di maart 2007. Awendia e ta e medio di comunicacion mas grandi na Aruba. Diariamente mas di 27 mil diferente usuario ta subi online, mas di 4 biaha y ta keda casi 3 minuut cada biaha. Pa siman ta surpasa 85 mil usuario y pa luna e ta mas di 265 mil diferente usuario. Riba Facebook nos ta e pagina di Aruba cu mas “likes” (84K) y tambe cu mas “engagement”