Diahuebs a laga henter un sala liber pa tratamento di e caso penal unda yiunan di dos lider politico mester a presenta pa nan participacion den un pelea publico. Sinembargo, e caso no a sigui.
Ta trata aki di e acusado, yerno di minister-president, Yowalfre Torres Mendez (studiando na Hulanda); Kevin Wever (Yiu di ministet-president); Nigel y Chris Williams (yiunan di Michael Williams di partido Pueblo Prome). Nan tabata envolvi den un pelea publico dia 14 di november 2021.
Ministerio Publico a trata pa regla e caso simpel aki via di un TOM Zitting pero e acusadonan Williams a insisti pa e caso bini dilanti y laga un hues husga. E dos rumannan Williams ta convenci cu e video di Azia Restaurant lo libra nan di tur acusacion pasobra ta mira cla cu ta e yerno di minister-president a tira cu boter y corta e coki den restaurant.
Fiscal no a ni yega na presenta e caso pasobra despues di algun consulta a dicidi di pospone tratamento di e caso wardando pa tur acusado, cu excepcion di un, ta den sala di Corte. Aunke cu dos di e acusadonan a pidi pa e caso sigui y nan lo ta presente via video call, mientras cu a pospone caso di un otro, a dicidi inicialmente pa sigui cu e tratamento.
Den e caso di Chris Williams a resulta cu diamars el a dicidi di cambia di abogado mr. Desiree Croes pa mr. Rosenstand. Esaki a causa cu diaranson den dia Croes a informa Corte cu e ta hala atras pa representa Williams den e caso aki. Rosenstand cu a haya e cliente aki asina riba man y sin cu el a haya ni e dossier pa tira bista den dje, a pidi Corte wanta tratamento di caso di su cliente. Hues a bay di acuerdo.
Na momento cu a dicidi di yama Nigel, kende a perde vuelo pa bolbe Aruba diaranson for di Merca, a resulta cu no por haya comunicacion cu ne. Su abogado mr. Peter Mohammed a haci varios intento pa yam’e riba su celular pero sin resultado. Aunke cu Kevin Wever si tabata presente cu su abogado mr. Reinkemeyer (asisti pa mr. Anthony Ruiz), hues a bisa cu e no ta mira sentido pa trata e caso di e forma ey. El a splica cu a reserva henter un dia, el a studia e dossier profundamente, a mira e video di e sucedido y kier haci pregunta na tur e acusadonan di loke el a mira riba video. Y pa un otro hues tuma e caso over, e lo tuma basta hopi pa e por bolbe bini dilanti.
Na final el a pidi Wever y Torres Mendez si nan por sigui e caso dia 3 di april awo, cual nan a bay di acuerdo. Mr. Rosenstand tambe a bisa cu pa e fecha ey e lo ta cla y a pidi mr. Mohammed percura cu Nigel no perde vuelo atrobe. Como cu e caso ta riba un dialuna no sa ainda cual sala lo bay uza. Pero e fecha ta sigura.
