Siman a habri cu tratamento di caso Avestruz den Corte di Prome Instancia. Dialuna mainta mayoría di e diesun acusadonan tabata presente den sala di corte, sin embargo, Hues mr. De Doelder, a haya cu lo tabata demasiado largo pa atende cu tur den un solo sesion. A instrui acusado Richardson, Every, Nuñez y Werleman pa retira y regresa diamars dia 25 di october.
Mr. De Doelder ta un hues cu a bin for di Hulanda specialmente pa atende cu caso Avestruz. Su prome pregunta tabata den direccion di acusado Mary Winterdaal, a traves di video en bibo ya cu Winterdaal ta bibando actualmente na Zwolle, Hulanda. Pero e acusado no por a ni contesta ya cu el a bira demasiado emocional pa papia. Su abogado, mr. Emerencia a pidi pa duna chens di recupera y sigui cu otro persona.
E ora ey Hues a haci pregunta na acusado Franklin Abath tocante su funcion den e maneho di peticion di tereno haci door di acusado Arends. Abath a splica cu tabata controla cu e persona ta cumpli cu e rekisito pa bin na remarke pa e fase di ‘optie’, cu ta prome cu e fase di otorgamento di erpacht mes. Hues a puntr’e detaye di si e tabatin autoridad pa dicidi, na loke Abath a splica cu no.
Tambe puntr’e dicon Arends su N.V. a obtene dos tereno, mientras cu su peticion tabata un. E ultimo aki Abath a splica cu por ta relaciona cu e situatie tekening. Mas dilanti Sevinger a añadi cu un practica comun pa proyectonan comercial, teniendo cuenta cu con e parcelanan a wordo parti. Un por ta demasiado chikito y p’esey ta mara nan na otro.
Hues a puntra dicon e peticion tabata entrega personalmente na, e tempo ey, minister Sevinger directamente. Sevinger a splica cu esey semper t’asina, y te cu dia di awe ciudadanonan ta entrega peticion sea na DIP of directamente na e minister encarga. Sevinger ta djis pone cu e no tin obhecion (geen bezwaar/akkoord) y e departamento di DIP ta continua cu e tramite, cumpli cu rekisito y condicionnan mara na dje.
Mirando cu e tereno, ubica cerca di aeropuerto, inicialmente lo mester tabata un compleho di apartamento, pero despues a cambia pa un carwash, hues De Doelder a puntra Abath si no mester a cambia e ‘bestemming’ na loke e ex-funcionario a splica cu no tabata necesario pasobra ta cuadra cu maneho di e zona specifico ey.
Den e prome pregunta cu hues a haci na acusado Maria Leoncita Arends, esaki a contesta cu su fout tabata di no a controla loke Alwin Lin a haci p’e a traves di abogado Ruiz di bufete Croes Wever Ruiz. Arends a bisa cu, como comerciante el a haya un oferta y el a tum’e keriendo cu tur cos tabata debidamente regla door di abogado. Na e momento ey abogado Doris Canwood, kende ta representa Arends, a bisa cu su cliente no tin conocemento huridico pa contesta e pregunta di hues, pero cu ta punto cu lo bin si dilanti den e caso.
Un parti interesante den e tratamento di e caso dialuna mainta tabata relaciona cu declaracion un testigo di fam Roga. Roga ta un ex-empleado di Arends kende a bisa di lo a hiba un envelop cu 350 mil florin den dje pa cas di Sevinger. Riba pregunta di hues, tanto Arends como Sevinger a yama Roga pa gañado y cu su declaracion ta un ‘totale nonsense’. Sevinger a lesa un parti di e declaracion di Roga na Landsrecherche y cu ta forma parti di e dossier. El a splica dicon varios cos cu Roga a bisa no ta cuadra y ta contradeci su mes. Abogado Canwood tambe a ilustra, pa medio di un envelop, cu loke Roga a bisa no ta cuadra.
Fiscalnan van Erp y Rethmeier tambe tabatin varios pregunta pa acusado Abath, Sevinger, Arends y tambe algun pa Winterdaal. Tabata pregunta mas enfoca riba e proceso di otorgamento di tereno, esta ken ta responsabel y con ta cana e fase di ‘optie’ y di ‘erfpacht’. Hues tambe a puntra Winterdaal pakico el a bay biba na Hulanda y kico ta su condicion di bida. Na final, abogado defensor di Sevinger, mr. Kock a cita artikel 4. di Landverordening Uitgifte Eigendomen cu ta bisa cu tur peticion di tereno di Land Aruba mester ta entrega na e Minister di Infrastructura como argumento cu no tabatin nada contra ley ora cu un persona entrega esaki directamente na e mandatario.
Na salida di Corte, abogado Canwood a expresa cu e ta bay cu un bon impresion di con e mainta a bay caminda cu e ta sintie sigur pa e echo cu preguntanan haci ta basa den informacion cu ya tin e dossier, pues no tabatin ningun sorpresa. “No. Pa nos o tin nada nobo. Tur cos ta den dossier. Nos no tabata tin sorpresa, si mi mag di bisa hopi eerlijk.” A puntra acusado Sevinger riba e confusion cu hues mr. De Doelder tin pa cu e manera con cosnan ta cana na Aruba, specificamente pakico un persona ta entrega un peticion di permiso directamente na e minister y pakico su persona, den un supuesto declaracion na prensa, a referi na acusado Arends pa su prome nomber y no como ‘Señora Arends.’
“Nos ta biba den un comunidad chikito, tur hende conoce otro. Ken na Aruba no sa cu Leoncita yama Leoncita. Maske cu su nomber mes ta Maria, tur hende conoce asina,” Sevinger a expresa. Mescos cu su nomber ta Oslin, pero tur hende ta yame Benny pasobra esey ta loke ta biba den comunidad.
Pa loke ta peticion di tereno cu e mes a ricibi, a indica cu: “Prome cu mi, durante mi periodo y despues di mi, te awe, hende ta manda carta pa minister pa tereno. Un ta pidi advies, otro ta bisa cu no tin nada contra, otro ta geef door. No ta ami a inventa esey. Mi a bin hay’e asina y te dia awe e ta asina.” Asina e mandatario a bisa indicando cu na Hulanda no por manda carta pa Rutte, pero ciudadano si ta manda carta pa miembro di gemeenteraad. Sevinger a bisa cu e lo aclaria esey y mas na Hues.
