Awe mainta hues a rechasa e peticion pa suspende e encarcelacion di e sospechoso Pieter Susebeek den e caso penal Avestruz.
Ayera hues a trata e caso y awe mainta el a dicta e sentencia. Esaki ta nifica cu probablemente Pieter Susebeek lo tin cu sinta te cu por lo menos 16 di juni prome cu e por recobra su libertad. Tabata dia 5 di mei ultimo cu a detene e comerciante na su cas, como sospechoso den e caso aki. Mientrastanto algun dia pasa a transport’e pa KIA.
Diabierna awo ta dicidi riba e sospechoso principal, e actual parlamentario Benny Sevinger si ta prolonga su detencion tambe.
Ayera e parlamentario a cumpli un siman deteni pa e caso Avestruz.
Ta acusa e parlamentario di e.o. soborno di un ambtenaar, falsificacion di firma y lo ta forma parti di un organisacion criminal.
SOSPECHOSONAN DEN LIBERTAD
Den e caso aki tabatin varios persona deteni, cu a sali liber. Nan ta entre otro Rebecca Richardson, su mama Leoncita Arends, Franklin Abath, Freddy Every, Jeff Franken, Gaby Werleman y su casa Ninosca Nuñez, Mary Hsing y por ultimo e casa di Benny Sevinger mes, Claudia Sevinger, kende dia 29 di mei ultimo a sali liber.
E CASO AVESTRUZ
Ministerio Publico a informa dia 2 di october 2019, dia cu a haci e entradanan hudicial, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro echonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017.
