Despues di un lucha di casi cinco aña pa e por bin keda cerca un yiu di dje Maria Villena Barreto a haya un decision positivo di LAR. Den e decision ta menciona cu no ta mira motibo pa nenga e permiso y no ta kere cu e caso aki ta uno pa crea precedente.
Dia 13 di augustus di aña 2021 minister encarga cu DIMAS a rechasa su peticion pa un permiso di estadia bou e concepto di reunificacion familiar. E prome rechaso pa un peticion asina ta data for di juli di aña 2019 y riba un decision di 22 di september di aña 2022, pa cual a bini e ultimo veredicto aki di corte, e minister a bisa cu e obhecion entrega contra su decision no tin base.
Dia 7 di october e viuda di e consul Venezolano na Aruba a dicidi di bay den apelacion y a trata e caso dia 11 di januari di aña 2023. E minister su posicion ta cu e señora en cuestion no ta cumpli cu e condicionnan pa bin na remarke pa un permiso di estadia bou di e capa di reunificacion familiar. E tipo di permiso aki ta conta pa un casa of un yiu menor di edad.
Abogado mr. Desiree Croes a splica corte cu banda di e laso familiar y e otro lasonan emocional normal, tin otro elemento di dependencia cu ta haci cu por otorga e permiso a base di articulo 8 di Tratado Europeo pa Derecho Humano (EVRM). Pero e mandatario ta bisa cu e no ta mira nada den e elementonan ey. Pa colmo, a bisa cu e mandatario no a motiva pakico a rechasa e peticion, si ta debi na interes general of algo di siguridad.
E peticionario ta un señora di 82 aña cu desde aña 2018 ta viuda. E tin problema di salud y no por biba su so mas. Na Venezuela e no tin mas famia cu por cuid’e. Su dos yiu homber adulto no ta biba na Venezuela. Un yiu ta biba na Panama pero no tin e recursonan financiero y e otro yiu ta biba na Aruba. E ta naturalisa Hulandes y ta dispuesto pa tuma e responsabilidad pa su mama.
E echo cu e leynan di Aruba no ta duna e chens pa un yiu para garante pa su mayornan, no ta haci cu ta permiti pa gobierno mete den nan bida familiar, segun e ponencia di e abogado.
No a motiva pakico a rechasa su peticion, si ta debi na orden publico of interes general. Su presencia aki na Aruba lo no trece ningun di e dos aspectonan ey na peliger y e no ta un peliger pa mercado laboral.
Nan discusion ta si e minister tabata hustifica pa rechasa e permiso di estado temporal. Segun Ley di Admision y Expulsion e mandatario por rechasa un peticion asina basa riba e peligernan ya menciona, esta siguridad of orden publico (salud y mercado laboral).
Articulo 8 di EVRM tur ciudadano tin derecho pa su bida priva, su famia y bida familiar. No por dicidi pa un famia con ta hiba nan bida familiar, a menos cu e ta necesario pa siguridad nacional, orden publico, of bienestar economico di e pais.
E señora aki di 82 aña a biba na Aruba den e periodo di aña 1993 te cu aña 1995 y di aña 2001 pa aña 2003. Esey tabata tempo cu su casa tabata cu e consul di Venezuela na Aruba. E esposo a fayece na aña 2018. E aña ey el a drenta Aruba como turista na december y dia 2 di juli di aña 2019, su yiu homber a haci un peticion pa permiso di estadia temporal. Pero no a haya un decision y a entrega un obhecion pa un falta di decision.
Dia 18 di januari di aña 2021 tabatin un veredicto. A rechasa e peticion pasobra no a cumpli cu e procedura y no a duna chens pa haci e peticion via di e formulario corecto. Ley di LTU no ta bisa cu no ta atende un peticion pasobra e no ta yena den e formulario corecto y entrega na oficina di DIMAS. Pues inhustamente no a atende cu e peticion, sin dun’e chens pa drecha e situacion. Pues e apelacion tin base.
Ta destrui e rechaso ficticio riba e obhecion di e señora. Minister mester dicidi den un termino riba e obhecion, teniendo cuenta cu lo siguiente. Duna e señora un documento via cual e por haci su peticion. Esey ta loke a sosode. Pero den un decision riba 13 di augustus di aña 2021, minister a rechasa e peticion pa permiso di estadia temporal. A entrega un obhecion contra e decision dia 31 di augustus di aña 2021. Pero no a haya contesta pa cual a bay den apelacion. Dia 9 di mei di aña 2022, corte a destrui e decision ey y a dicidi cu den tres luna tuma un decision real riba su obhecion. E storia a sigui y a permiti pa yena e formulario.
E minister a bisa cu e obhecion no tin base y cu su decision di 13 di augustus di aña 2021 ta keda vigente. Awo corte a bisa cu berdad den e handboek di LTU no tin un provision pa e situacion manera di e señora aki.
Corte a bisa cu Corte Europeo a acepta cu entre e adultonan y nan mayornan tin un laso familiar cu mester proteha. Hasta si e adulto no ta biba cu su mayornan y tin su propio famia y cas. Den e caso aki a keda proba cu e señora debi na su edad y salud, no por cuida di su mes mas y cu na Venezuela no tin famia pa cuid’e. E ta depende di su yiu cu ta biba y traha aki. E tin cierto relacion cu Aruba durante seis aña kedando legal como casa di un consul.
Minister no a splica suficiente y no a motiva pakico a rechasa e admision di e señora si ta debi na interes general of orden publico. No ta kere tampoco cu esaki lo crea un precedente, a base di situacion similar. Pues corte ta bisa cu e minister no tabatin suficiente motibo pa rechasa su peticion a base di e motibonan humanitario pa biba aki cu su yiu.
Pues e apelacion tin base y a destrui e ultimo decision di e minister. Den tres luna di tempo mester tuma un decision nobo, teniendo cuenta cu e evaluacion ariba menciona di corte.
