Dia 20 y 21 di september proximo lo tuma luga e Casibari Jazz Festival, den su prome edicion na Casibari Cafe mes. Dia 20 y 21 di september, lo ta e dos fechanan cu mas di 60 artista, tanto local como internacional, lo ta uni pa asina nan comparti nan arte, tanto cu e bishitantenan local, como tambe turista.
Ora cu papia di artista, no ta solamente di musica, pero tambe lo tin diferente artistanan cu lo elabora nan arte, manera artesanonan, cu lo ta presenta durante e dianan y tambe e arte culinario no lo bay haci falta, manera cu semper ta custumbra den e eventonan aki, na unda cu e parti di e Food Court tambe lo ta presente. Esaki a wordo splica door di Mark Benson, kende ta n di e hostnan di e evento aki.
Eric Jan Eman a elabora riba e cambio di loke ta conoce den e ultimo 12 añanan, como e Caribbean Sea Jazz Festival, pa e Casibari Jazz Festival, y el a comenta cu ta bay tin dos escenario. Fuera di musica riba e escenario e dos dianan aki, ta bay tin hopi cos hopi interesante cu e mercado parti pafo, esta e Food Court y arte naturalmente.
Pa loke ta artistanan ta bay tin artistanan tanto local como internacional y cu e culminacion diasabra cu Randall Corsen hunto cu Tania Cross. Tambe tin presentacion di e internacional Tony Succar.
Di parti di UNOCA, Ray Ann Hernandes, a remarca cu e tipo di musica cu ta wordo presenta durante e Caribbean Sea Jazz Festival cu nos custuma cun’e, no necesariamente ta main stream popular na Aruba, pero si tin un gran cantidad di musico local cu ta toca den hopi grupo di jazz, di blues. Por mira cu ta bay tin string quartet y diferente otro tipo di musica cu na Aruba ta custuma cun’e, cu no ta Reaggeaton, salsa, e merengue cu nos ta scucha normalmente riba radio. Esaki ta algo mas special. Algo cu e musiconan local ta tuma tempo pa loke ta ensayo, preparacion. Nan ta dedica hopi na prepara un presentacion pa e publico, caminda cu nan ta haya e ora un plataforma cu nan no tin normalmente na Aruba. Ta algo sumamente importante pa duna nan e espacio pa nan por presenta nan arte cu ta arte di musica na Aruba.
