Cas di Cultura ta informa riba e protocol vigente for di juli 2020, ora ta trata evento na Cas di Cultura. Tanto cliente como e bishitantenan ya conoce esakinan, pero ta bon pa ripiti pa esunnan cu no ta na altura.
Hunto cu DVG y Crisisteam e reglanan aki a keda acorda:
· Ora di drenta edificio, tapaboca ta obligatorio constantemente, inclui den salanan.
· Ta haci contact tracing na porta, sea organisador ta entrega lista caba of personal di Cas di Cutlura ta haci esaki ora publico drenta.
· Ta midi temperatura y spray man cu sanitizer.
· Por drenta sala grandi mesora pa sinta riba stul liber cu bo grupo/famia, cu no ta marca cu tape cora, den e rij liber cu ta habri. Esaki ta percura e distancia safe.
· Maximo di 150 persona presente como publico durante show den auditorium cu tapaboca.
· Backstage por tin maximo 40 persona, sinta riba asiento asigna cu tapaboca.
· Sala Unoca, banda di cafe, por tin maximo di 50 persona sinta, tambe cu distancia fisico entre stoel.
· Riba stage a acorda un maximo di 16 persona, cu distancia fisico di 1.5m y tapaboca bisti.
· 1 cantante so mag di ta sin tapaboca. Coro di back-up mester tin tapaboca y distancia fisico.
· No tin bailamento door di publico.
· No tin pauze, pues por cumpra cos di bebe prome cu show, solamente un persona di famia/grupo.
· No ta permiti algomeracion den foyer (lobby), ni prome ni despues di show.
· Ta sanitize despues di cada show.
No ta conoci cu contagio a sosode na Cas di Cultura, pues team y directiva di Stichting Schouwburg Aruba ta gradici pueblo, e artista- y organisadoran cu nan bon comportacion pa cu e reglanan. Cas di Cultura ta contento cu e mundo cultural/artistico na Aruba por a haya aliento pa medio di nos plataforma y e reglanan y ta duna danki na DVG y Crisisteam di a duna nos e confiansa aki.
Mas artista y grupo ta bon bini pa sondea pa organisa nan evento den nos espacio safe. Na otro paisnan, teatro ta den situacion hopi grave, pues nos ta gradicido. Keda mira Cas di Cultura su Facebook page y website pa actividadnan publico y percura pa cumpra bo carchi na tempo paso asiento ta limita ainda. Stay safe!
