Entrante prome di juli 2024, e salario minimo na Caribe Hulandes lo ta $1.750 dollar pa luna. Esaki minister Schouten (maneho di pobresa, participacion y pensioen) a anuncia durante su bishita na Caribe Hulandes di 23 pa 27 di october.
E gastonan di e dunado di trabou ta baha pa compensa e dunado di trabou den e gastonan adicional. Ademas di e salario minimo, e beneficionan social tambe ta subi. E compensacion pa yiu ta aumenta cu mas o menos 90 dollar pa mucha pa luna entrante prome di januari 2024.
Habitante cu tin un salario minimo of un beneficio social ya caba ta bay dilanti entrante prome di januari 2024. Na Boneiro e salario minimo pa un hende di 21 aña cu ta traha 40 ora pa siman ta subi te 1.570 dollar pa luna, na Sint Eustatius te 1.555 dollar y na Saba te 1.654 dollar pa luna. E onderstand pa un soltero cu ta biba riba su mes y AOV y AWW ta subi entrante prome di januari na 1.335 dollar pa luna na Boneiro, 1.322 dollar na Sint Eustatius y 1.406 dollar pa luna na Saba. E compensacion pa yiu ta subi te 225 dollar pa mucha pa luna na Boneiro, 216 dollar na Sint Eustatius y 225 dollar na Saba.
E motibo directo pa bishita di e minister tabata e rapport “Un Bida Digno” di e Comision social minimo social Caribe Hulandes. E comision a presenta e rapport aki na minister Schouten y secretario di estado Van Huffelen (Relacionnan den Reino y Digitalisacion) riba 6 di october. Sr. Thodé, presidente di e comision aki, a compaña e minister durante e bishita.
Durante e biahe, minister Schouten i Sr. Thodé a papia cu (representantenan di) entre otro conseho insular, colegio ehecutivo, sindicato y dunado di trabou. Durante e combersacionnan aki e tema central tabata e rapport di e Comision y e miho manera pa cumpli cu e recomendacionnan di e rapport.
Minister Schouten: “Hopi hende ta pasa den situacion dificil riba e islanan. Un di cada tres ta biba den pobresa: esey ta preocupa mi y ey tin un encargo. E rapport di e Comision minimo social Caribe Hulandes ta indica con tur hende na Caribe Hulandes por tin un bida digno. Pa e motibo ey e gabinete ta tuma accion awo. Tanto riba e parti di entrada, cu e aumento di salario minimo i beneficionan social i compensacion pa yiu adicional, como tambe riba e parti di gastonan di coriente, awa y internet. Esaki ta un paso importante, pero ainda tin hopi pa haci pa mehora e situacion di e hendenan na Caribe Hulandes.”
Sr. Thodé: “Pobresa no ta normal, sigur no den un pais rico manera Hulanda, cu e islanan aki ta forma parti di dje pa 13 aña. E ta e resultado di con nos ta dicidi di comparti nos prosperidad cu otro. E no ta compleho ni complica, pa motibo cu tin suficiente espacio pa e minimo social aki, manera nos ta mustra den nos estudio. E prome pasonan bon a tuma luga awo pa loke ta trata salario minimo, beneficio social y un cantidad di puesto di gasto importante. cu esaki e gabinete ta tuma un paso grandi pa combati pobresa na Caribe Hulandes. Mi ta spera cu lo tin mas paso ta sigui pa loke ta trata e gastonan.”
E gabinete structuralmente a pone 32 miyon euro disponibel pa e islanan. For di e montante aki ta paga aumento di e beneficionan social y compensacion pa yiu menciona. Ademas, e subsidio di energia di 1300 dollar pa aña pa es cu entrada abou ta keda, mescos cu e reduccion di e tarifa fiho di electricidad. E tarifa di awa di bebe y di internet ta sigui baha y tambe e gabinete ta haci cuminda di scol gratis posibel den 2024 y ta pone 1 miyon euro disponibel tambe den 2024 pa sostene e maneho local di pobresa na Caribe Hulandes. Ta bay tin 700.000 euro disponibel pa transporte publico riba e islanan.
Anexo cu medida
Salario minimo entrante prome di januari 2024 (pa luna)
Boneiro: $ 1.570
Sint Eustatius $ 1.555
Saba: $ 1.654
Beneficio social minimo entrante prome di januari 2024 (onderstand pa un persona soltero cu ta biba riba su mes, AOV, AWW, pa luna).
Boneiro: $ 1.335
Sint Eustatius: $ 1.322
Saba: $ 1.406
Compensacion pa yiu entrante prome di januari 2024 (pa mucha pa luna)
Boneiro: $ 225
Sint Eustatius: $ 216
Saba: $ 225
Salario minimo entrante prome di juli 2024 (pa luna)
Boneiro: $ 1.750
Sint Eustatius $ 1.750
Saba: $ 1.750
Beneficio social minimo entrante prome di juli 2024 (onderstand pa un persona soltero cu ta biba riba su mes, AOV, AWW, pa luna).
Boneiro: $ 1.488
Sint Eustatius: $ 1.488
Saba: $ 1.488
Subsidio di energia pa e entradanan mas abou: $ 1.300 (pa aña)
Reduccion tarifa figo di coriente te sero: $ 33 (pa luna)
Reduccion tarifa di awa pa bebe: $ 5 (pa luna)
Reduccion tarifa di internet: $ 15 (pa luna)
Sosten pa maneho local di pobresa: € 1 miyon (pa Hulanda Caribense completo)
Cuminda gratis na scol: € 1 miyon (pa Hulanda Caribense completo)
Sosten transporte publico: € 800.000 den 2024 (€ 700.000 structural entrante 2025)
Sosten banco di cuminda Boneiro: € 100.000 adicional den 2024 (€ 300.0000 structural entrante 2025)
