Den oranan di merdia polisnan a bay busca un homber na aeropuerto. E motibo tabata cu Capitan di e aerolinea United a nenga un pasahero di subi avion si no tin extra siguridad.
Un situacion no normal a surgi na aeropuerto cu un pasahero Mericano di fam Smith. Segun por a compronde, e pasahero a yega Aruba diadomingo. E dia ey caba tabatin un problema cu ne, pa motibo cu asina e avion a para, el a habri e porta di emergencia y a bula riba rampa, violando tur regla di siguridad.
E dia ey ta trahadonan cu a mira un persona no conoci y sin badge bisti canando rond, a pone cu nan a bati alarma mesora na siguridad y inclusive K-9 Unit tambe a acudi na e sitio. Loke cu a hala atencion tabata cu el a uza Duct Tape na su pia, pa pega e carson riba su pianan. A logra gar’e hopi lihe.
Autoridadnan a dicidi di no tuma riesgo y a want’e na Guarda Nos Costa pa sake di e isla riba e siguiente vuelo di United cu tabata esun di dialuna mainta. Pero ora cu a yega aeropuerto y a constata cu tabata trata di e persona, e Capitan a nenga rotundamente di acept’e, amenos cu tin dos guardia pa compañe durante e vuelo.
Awo e problema ta den scochi di autoridadnan cu mester keda pendiente pa sake. Como cu ta trata di un persona Mericano cu e mesun United a trece, ta nifica cu e aerolinea ta esun responsabel pa pone dos security pa bay cu ne bek Merca.