Dia 17 di juli ultimo, e hoben local residencia na Hulanda, Nicole Manzo a lansa un cantica yama ‘Hayabusa’, hunto cu e artista Dixson Waz, miho conoci pa su hit viral “Toco toco to” y tambe cu e artista Dachoyce di Brasil. Productor di e cancion aki ta e ganado di varios premio di platino, Morry.
Nicole, hunto cu Morry, a traha rib’e cantica aki. Nos tabata di acuerdo c’un artista femenino lo zona hopi bon rib’e track hunto cu su bos. Door cu Morry ta traha hunto cu Dachoyce acaba, a logra pa laga Dachoyce scuch’e. El a gusta e cantica y asina tambe a tuma e decision di skirbi e cantica hunto.
Nan a cera conoci cu e organisadonan di e evento Papi Chulo, cu ta un evento di fiesta Latino y nan a informa cu nan lo trece Dixson Waz pa canta na un festival aya na Hulanda. Durante Dixson tabata na Hulanda, el a bay den studio hunto cu Nicole y Dachoyce unda cu a lag’e scucha e cantica Hayabusa. El keda encanta cu e cantica aki y el a dicidi cu e tambe kier ta parti di e cantica aki. Asina ‘Hayabusa’ a bira loke e ta actualmente.
A lansa e cantica bou di e seyo di Papi Chulo Records y na mei ultimo a trece Dixson Waz pa filma e video ayanan na madre patria, Hulanda.
Nicole ta sumamente contento di e apoyo cu e ta ricibiendo, incluso riba Spotify na Hulanda, den e clubnan Latino, radio na Hulanda, Republica Dominicana, Miami y tambe radio na Aruba.
Ken ta Nicole Manzo?
For di un edad hopi jong, Nicole a cuminsa cu musica. El a participa den hopi contest na Aruba, manera por ehempel, Tumberito.
Na 2017, Nicole ta bandona Aruba pa establece su mes na Hulanda, pa motibonan di estudio. Ayabou el a cuminsa conoce mas hende den musica. Pocopoco el a cuminsa traha cu e productornan Hulandes y tambe cera conoci cu mas hende den e escena di musica Latino.
El a cuminsa cu su trayecto como compositor unda cu el a yuda skirbi cantica pa varios artista den e escena Latino, manera por ehempel Malu Trevejo.
Na 2019, e compania BMG a firma Nicole pa skirbi cantica y for di eynan el a cuminsa traha riba su mesun musica cu yama ‘Presidente’. Poco el a haya mas apoyo aya na Hulanda, Spaña y Miami. E aña aki e lo ta cantando na Festival “Latin Village” cu ta un festival hopi grandi Latino y tambe e lo ta cantando na otro festivalnan durante e temporada di zomer.
